Aizawl Municipal Corporation-in bawlhhlawh halralna khawl, incinerator a lei chu a hman tlak loh zui niin ZPM Thalai chuan an sawi a. Mipui sum tam tak an luanral tir, tiin, MNF president Zoramthanga leh Aizawl mayor hlui Lalrinenga Sailo chu mawhphurtu ah ngaiin mipui hnenah ngaihdam dil turin an phut tih an sawi.
ZPM Thalai Hqrs. thuchhuak chuan, AMC-in Aizawl khawpui bawlhhlawh halralna tur AMC Solid Waste Management Centre Tuirial Airfield Venga incinerator a bun chu kumin April 15-a RTI zawhna chhannaah, hman theih a ni lo tih a ni a. April 16-ah ZPM Media & Publicity Department-in a hmunah tlawhin, he khawl hi hman theih a niloa, September 3-a RTI chhannaah pawh khawl hi hman theih a la nih loh thu bawkin chhan a ni tih a sawi
Incinerator khawl hi AMC-in 2022 September 7-ah supply order hmangin Aegis Smart Logix India Private Limited Hyderabad hnena a lei a ni. Supply order-ah hian khawl hi dual chamber, ton 10 (kg. 10000) capacity, semi automatic tur a ni a, environmental clearance pawh tel tura tih niin, a man hi Rs. 2,60,78,000 atangin Rs. 2,34,70,200 (90%) pek a ni tawh.
‘He khawl hi a tir atangin a fuh lo hle a. Supply order atanga a lan danin, thla thum chhunga bunfel tura tih a nih laiin, kum 4 hnuah trial run vawi hnih an neih hnu pawhin official-a hman (commission) theih a la ni lo,’ a ti.
ZPM Thalai thuchhuak chuan, khawl hian darkar 24 chhungin bawlhhlawh kg. 10000 halral thei tura tih a nih laiin, a khawl that lai pawh hian kg. 500- 600 an halral thei chauh a, a capacity atanga 5-6% chiah an hal chung pawhin a khawl hian a tawrh phah a, a nihna tura hman a nih hma hauhin a chhe ta a, waranty period a zawh tawh avangin siamtha leh turin Mizoram sawrkar sum bawk hman a ngai dawn a, pollution chungchanga environmental clearance pawh hmuh theih a rinawm loh a, he khawl hi siamtha leh pawh nise hman zui theih tura ngaih a nih loh avangin, tuna ZPM sawrkar chuan a thar lei dan a ngaihtuah ta ngawt mai tih a sawi a ni.
‘Heti khawpa khawl tha lo leitu leh mipui sum nuai tam tak a thlawna luanral tirtu MNF AMC sawrkar khan mawhphurhna la ngam se kan ti a. MNF president leh Aizawl mayor kalta hian October 2026 chhung ngeia mipui hmaa ngaihdam dil turin kan phut a ni,’ a ti.
Incinerator chungchangah hian a supply-tu Aegis Smart Logix India Pvt. Ltd laka dan anga hma la turin MNF kaihhruai AMC sawrkar khan hun a nghah hle a, supply order period a ral hnuah pawh kum thum chuang hmalakna hun a nei a. Heti chunga he khawl chungchang an ngawihbo pui hmak chu mak an tih thu ZPM Thalai hian sawiin, ‘, MNF AMC corporator-ten Hyderabad-a zin chilh meuha an enfiah hnua lei a nih avangin, incinerator khawl supply chungchangah hian MNF party leh phai lam company hian puanhnuai thil an nei em ni, tih hi kan zawhna a ni,’ a ti.
Incinerator hman tlak loh lei vangin ngaihdam dil an phut
