Chief Election Commissioner Gyanesh Kumar-a chuan Ningania West Bengal leh Tamil Nadu-a voter-te chu ramin zalenna a hmuh hnua state pahniha vote an thlak that ber tum a ni tih sawiin a fak.
West Bengal-a assembly inthlan thawh khatnaah hian bial 152-a vote thlak niin vote hi 91.91% a tla a, Tamil Nadu-ah pawh 84.80% vel a tla bawk niin niin ECI-in a chhinchhiahnaah tar lan a ni.
“Ram indan hnua West Bengal leh Tamil Nadu-a vote thlak zat percentage sang ber a ni a. West Bengal leh Tamil Nadu-a voter-tute ECI chuan chibai a buk a ni,” tiin Kumar-a chuan inthlan khar a nih hnuah a sawi.
West Bengal-a district eng emaw zatah vote tla zat hi 90% chuang a ni a. Dakshin Dinajpur-ah 94.85% tlain a tlak tamna ber a ni a, Cooch Behar-ah 94.54%, Birbhum-ah 93.70%, Jalpaiguri-ah 93.23%, Murshidabad-ah 92.93% ten an dawt a. Hei hian state pumah vote a tla tha tlang tih a tar lang a, district lian zawng zawngah chuan 90% aia tam vek a tla a ni.
Tamil Nadu-ah pawh district pawimawh hrang hrangah vote tla a tha hle hlawm a, Karur-ah 92.48% tlain a tlak thatna ber a ni a. Salem-ah 90.42%, Dharmapuri-ah 90.02%, Erode-ah 89.97% leh Namakkal-ah 89.63% tlain an dawt hlawm.
Kum 2021 assembly inthlanpuiah khan West Bengal-ah hian vote tla chu 85.2% a ni a, Tamil Nadu-ah 76.6% a ni thung a ni.
Ningania venhimna khauh tak karah Tamil Nadu-a assembly bial 234 leh West Bengal-a bial 152-a vote thlak hi buaina liantham awm lova zawh a ni a. West Bengal-ah hian a thawh hnih nan bial dang 142-ah May 29-ah vote thlak leh tura ruahman a ni a, May 4-ah vote chhiar a ni ang.
Indan hnua Bengal leh Tamil Nadu-a vote tlak that ber tum
