India-a thlifimtututen Venezuelan tuialhthei lei dan dap mek
Mangalore Refinery & Petrochemicals Ltd (MRPL) chuan khawthlang ramte hrekna avanga Russian tuialhthei lei a tihtawp hnuah Venezuelan tuialhthei lei dan tur a ngaihtuah mek tih an finance hotu, Devendra Kumar-a’n a sawi.
Sorkar hnuaia tuialhthei thlifimtu hian India chhim lama Karnataka-ah ni tin barrel 5,00,000 a thlifim thin a, a thlitfim sa 40% chuang hi ram danga hralh chhuah leh thin a ni.
“Hrekna chi hrang hrang khauh tak avangin Russian tuialhthei thlitfim loh hi engmah lak luh a awm tawh lo,” tiin Kumar-a chuan a sawi.
US-in October thla khan Russia-a tuialhthei thar chhuak tam ber pahnih, Rosneft leh Lukoil chu hrekin November 21 thleng ram dang nena an indawrna tihtawp hun atan a pe a, EU chuan January 21 thleng hun a nei thung.
“Tun hnai maiah chuan kan hnathawh emaw, kan thlitfim sa thawn chhuah min nghawng rih lo turah kan ngai,” tiin Kumar-a chuan a sawi a. Rei deuh hnuah erawh Russian tuialhthei an lei loh hian nghawng a nei thei dawn tih a sawi bawk.
Thlifimtute hian an mamawh zat nei turin thlitfim loh hi an lak luh 40% chuang chu Middle East atanga an lak luh a ni a, thawn chhuah bakah ram chhunga hralh chhuah leh hman tur tam tak an thlitfim a ngai bawk a ni.
MRPL chuan sumdawnna ang chia Venezuelan tuialhthei an chawk luh theih dan an ngaihtuah reng niin Kumar-a hian a sawi a, heng zingah hian a man leh an duh zawng a ni em tih pawh an ngaihtuah tel tih a sawi.
India-a tuialhthei thlifimtu dang – Reliance Industries Ltd, Indian Oil Corp leh Hindustan Petroleum Corp te pawhin Venezuelan tuialhthei lei dan tur hi an dap ve reng bawk.
An hlep a that zawk theih nan MRPL hian thlifimtu dang hnena thlitfim sa hralh ai chuan an fim lova an leisa hralh chhawn pawh an rilru mek bawk.
Company hian an tuialhthei hralh hi tuna hmun 200 atanga an hralh chhuah thin chu kum thum chhunga hmun 500 atanga hralh chhuah theih turin hma an la mek a, kum nga chhungin fuel station 1,000 neih hman an tum bawk niin Kumar-a chuan a sawi.
India-a thlifimtututen Venezuelan tuialhthei lei dan dap mek
