India-ah in tin luta chhiarpui hna tan a ni ta

India-ah in tin luta chhiarpui hna tan a ni ta
India chuan Ningani khan a ram chhunga mihring awm zat chhiarna tak tak chu a tan ta a, khawvela mihring tamna ber, tluklehdingawn 1.4 vel nia chhut chenna rama chhiarpui hi COVID-19 leng vanga kum tam tak tihkhawtlai a ni.
Thuneitute chuan state panga leh union territory pathumah survey an tan a, kum khat chhung awh tur chhiarpui chu an tan ta tih an sawi.
Thawktu maktaduai thum chuang, a tam zawk sikul zirtirtuten in tin an tlawh ang a, ram chhunga cheng chu a mal malin an chhiar ang a, state leh UT 36-ah, khaw 6,40,000 vel an tuam dawn a ni.
A chhiartu ngei kala in tin luh hi thawh hnih a awm dawn a. Pakhatnaah chuan in leh in dinhmun enin an kal ang a, pahnihnaah a chengte leh an eibar leh khawthlanga an dinhmun chhinchhiahin an tlawh leh vek dawn a ni.
Chhiarpui atan hian kum khat vel hun a la ngai dawn a, dollar tluklehdingawn 1.3 sen a nih rin a ni.
Kum sawm dana neih thin chhiarpui hi a dan pangngaiah chuan kum 2021-a neih tur kha a ni a, hri avanga tihkhawtlai a nih hnuah tuna mi hi March thlaah zawh fel tur a ni ang.
Thawktuten mi tlawha an chhiar hma hian mipuiten online hmanga an inziah luh theihna hun hawn a lo ni tawh a, sorkar portal-ah tawng 16-a hmanga mahnia inziah luh theih a ni.
Khua leh tuite chuan chhiatu (enumerator)-ten an tlawh hunah an nemngheh turin an dinhmun an lo ziak lut lawk thei a ni.
A hmasa ber atan India hian mobile app hmangin chhiarpui hi a nei dawn a, mahnia inziah luhna nen a kalpui kawl a. Web-based portal a awm bawk.
New Delhi chuan in tin awmna chhinchhiahna tur map siamna tur application a hmang bawk a, hei hi geographical area tenau takah thenin bial khatah in tlem tê chauh a dah a, hei hi mahnia inziak lutte pawhin awlsam taka an awmna an chhinchhiah luha survey dik tak a awm theih nana tih a ni.
Digital database hian hun hman pawh a tihtlem theih beisei a ni a, chhiarpuia thil hmuh chhuahte pawh rang zawka tihchhuah a nih theih phah dawn a ni.
Chhiarpui thawh hnihnaah hian chi (caste) chipchiar tak lak khawm a ni dawn bawk a. India hian kum 80 hnua a vawi khat nan kum 2011 khan caste a record a; mahse, a dik leh dik loh inhnialna a awm avangin an chhinchhiah hi puan zar vek a ni lo.
Chi behchhana inthliarna hi kum sang tam tak kal tawh atanga awm tawh niin India khawtlang nun leh politic-ah pawh nghawng nei phak a ni.
Chi bil behchhan political party pawh tam tak an awm a, sorkar zirna leh hnathawhnaah pawh chi hniam zawkte an luh leh thawh ve theih nan an puala seat hauhsak pawh kalpui a ni.