India-ah US Secy of State Rubio, Modi-a nen inkawm

US Secretary of State Marco Rubio-a chuan ni li chama India tlawh mekin Prime Minister Narendra Modi-a nen Delhi-ah an inbia.
Rubio-a hian Inrinni tuk khan khawchhak lama Kolkata a thleng a, khawpui lam a pan leh a ni. Jaipur leh Agra pawh a tlawh bawk ang.
An inkawmnaah hian Modi-a hnenah White House tlawh tura sawmna a pe niin US thuneitute chuan an sawi a. Hetihlai hian Indian prime minister chuan an pahnih hian ‘an pahnih inkar, khawvel pum himna leh muanna chungchang thilte’ an sawi dun tih a sawi.
Rubio-a’n a tlawh hi ram pahnihten eibara an inzawmna siam that an tum lai a ni a, Iran indona avanga khawvel pum huapa energy lama harsatna awm mek, India nghawng na tak kara tlawh a ni.
Israel leh US tang dunin Iran an beih hnuah Strait of Hormuz kaltlanga energy thawnna a tawp rih mek a ni.
Iran chuan khawvela tuialhthei leh boruakalhthei 20% vel phurh kalkawng chu khar hi US nena remna zawnga inbiakna an neihah lehlam nawr nan a hmang a ni.
Energy a mamawh 80% aia tam la luttu, India chuan hian kawngpui khar hi a tuar hle a. India-in tuialhthei thlitfim loh a lak luh zinga a zahve vel hi strait kaltlanga a lak a ni.
Rubio-a hian Middle East-a thil awm dan chu Modi-a nen an sawi niin a thupuangtu chuan an inbiak zawhah a sawi.
US thuneitu chuan, “Ani chuan Iran chu khawvel pum huapa energy sumdawnna chu a hren behtir dawn lo tih a sawi uar hle a, US-in energy product a neihte pawh India-in thawn theih a ni tih a sawi bawk,” a ti.
Rubio-a hian Modi-a nena an inkawm hma hian US chuan India hnenah ‘an lei ang zat energy’ hralh a duh thu a lo sawi tawh a ni.
Delhi-ah hian US atanga energy lak luh tihpun duhna a awm dawn a, hei hian India tana tha, sumdawnnaa an hlohna a titawp thei dawn a, US President Donald Trump-a erawh chuan tha a ti lo thung.
US-in India nena an bungruaa an insumdawn tawnna chu kum 2025 khan $ tluklehdingawn 58.2 niin kum 2024 aiin 27.1% zetin a pung a ni.
Energy la lut tur erawh chuan tihfel ngai a tam a. India tan US atanga energy phurh luh nan hian a kawng a thui a, a man a to zawk bawk.
Rubio-a zin hi Delhi leh Washington inkara sumdawnna chungchanga inremna siam chungchanga hun rei tak chhung buaina awm tawh leh nikum lama India leh Pakistan inkara buaina rei lote chhuak tu chin fel nge tih chungchanga inhnialna a awm mek laiin a ni bawk.
Trump-a hian inthenawm ramte inkara remna siamtu a nih thu a sawi nawn fo laiin Delhi chuan Asia chhim lama nuclear ralthuam nei ramte inkara inremna siamtu tur mi dang an awm lo tih a lo sawi ve tawh thin thung.
Delhi tilawm lotu langsar tak nia lang dang chu Trump-a’n Pakistani sipai hotu, Asim Munir a kawmngeih chu a ni a, US president chuan field marshal a duh ber a nih thu a sawi tawh.
Iran leh US inkara remna siam tura Pakistan hmalakna chuan Islamabad leh Washington inkar a tihnai zual bawk.
Hetihlai hian thla eng emaw zat kalta atang khan Washington leh Delhi inkarah inhriat thiamna a awm tan a. Trump-a’n kumin kum tira India laka chhiah sang a lak thin, thla 10 chhung an inkar tikhitu, 50% chu 18%-a a tihhniam hnuah an inkar hi a tha zual a a ni.