India aiawha taekwondo khel tur Vanlalthlamuanpuii

India aiawha taekwondo khel tur Vanlalthlamuanpuii
Kumin 2026 December 3-8 chhunga Rio de Janeiro, Brazil-a nghah tur International School Games taekwondo inelnaa India aiawh thlanna September ni 15, 2026, Thawhlehnia Raipur, Chhatisgarh-a zawh takah Vanlalthlamuanpuii (Nupuii) chuan a tumpuite hneh vekin under 53 kg category-ah India tana khel turin a dinhmun a sawhnghet.
Selection tournament-ah Nupuii hian a match hmasa ber leh quarter-final ni nghalah Delhi player chu 5-0, 4-0 -in a hneh nghal a; semi-final bout-ah Himachal Pradesh nula tum lehin, a hma aia nasa zawk 13-0, 16-0-in a sawp leh.
Final-ah erawh Uttrakhand nula Aastha Joshi, national champion ni lai nen an intumtawk hle.
Joshi hian a veikhawr a hmangtangkai thiam hle a, Nupuii’n harsa takin round khatna chu 1-0-in a la hram a ni.
Joshi hian chawlh hmangtangkaiin 2nd round-ah a technique a thlak thut a, hun tawp dawnah a zawna pet fuhin chiang takin 0-7 hma a hruai a, Mizo player a insiamtha hman lo!
Final round-ah Nupuii’n a tumpui a zirchiang ta a, a invenhim piah lamah point a pe let thei bawk a; a tumpui hian point hnih hmu mah se a thungrul ve zel a; hun tawp dawnah Uttarakhand player Joshi chesualin hrem a tawk hlauh a, 3-2-in Nupuii’n hma a hruailet.
He mi hnu hian point dang a luh belh ta lo a, Brazil rama kal turin Vanlalthlamuanpuii a tling ta zawk a ni.
Lalhmingthanga fanu Nupuii hi Children Guiding School, Zemabawkah lehkha zirin, taekwondo bik chu Guwahati SAI, NCOE-ah a training mek a, he hmun atanga India aiawh tur zawnna pawh hi hmachhawn a ni.
National level-ah medal tam tak la tawhin, kumin chhung ringawt pawhin gold medal pathum lai a awrh tling tawh a; ram pawn inelna lamah pawh tawnhriat nei tawhin, kumin April thlaa Tashkent, Uzbekistan-a World Taekwondo Junior Championship-ah khan India tan under-55 kg huangah khelin, round of 32 a thleng pha hial a ni.
Kumin December thlaa Nupuiite intihsiakna tur hi International School Federation (ISF) buatsaih Gymnasaide – International School Games niin, he Games-ah hian sports discipline pakua hmangin khawvel hmun hrang hranga sikul naupangte an inel dawn a ni.
Chu’ng intihsiakna turte chu Nupuii chhuahna tur taekwondo bakah athletics, beach volleyball, chess judo, karate, wrestling, virtual cycling leh virtual rowing-te a ni a; tuntum hi he inelna liana Mizo an inlan vawi khatna tur a ni nghe nghe.