BJP rorelna hnuaiah India democracy a nghing nasa hle a, journalist-te hial pawh an lei zo tawh niin Congress MP candidate Lalbiakzama chuan a sawi.
Lok Sabha inthlan tura Mamit district-a campaign-a fehchhuak Lalbiakzama chuan tun tum kan inthlang tur ang em em hian khawvel ramdangin India rama Lok Sabha inthlang tur an ngaihven ngai lo, nia sawiin, “Mother of Democracy an tih thin, India-ah hian khawvel hi an hlauthawng tawh. Opposition party hruaitu man khawm rup rupa jail-a dah hi Myanmar leh Afghanistan te tih awm tak a ni a. India democracy a nghing nasa hle,” a ti.
BJP an sawrkar leh a nih chuan inthlan a awm zel angem tih rin a har tawh a, inthlang mah ila, Russia ang maiin a tling tur hriatsa ang chauh kan ni tawh dawn niin a sawi bawk.
Central BJP sawrkar hian pawisak leh zahpah nei miah loin electoral bond hmangin sum a tuak tih Congress MP candidate hian sawiin, “CBI, ED leh IT department hmangin company liante an tih thaih a. Political party leader dangte an man khawm a, tunah hian CM nilai pahnih jail ah an tan tir mek. Khawvel democracy ramdangte hian democracy-ah min ngai lo mek a. News lian zawng zawng an lei zo deuhthaw tawh a. BJP fakna channel an ni zo deuhthaw tawh,” a ti.
Democracy leh missionary chhan turin BJP paih a, NDA hnawl ngam turin an khawngaih vote a dil tih a sawi a ni.
MPCC president Lalthanzara chuan MP inthlan turah ram hruaitu kan thlang dawn a ni ngawt loa, chanchintha hril darh zel duhtute leh kan Pathian biak in min suasam saktu BJP thawhpui NDA nena indona a ni, tiin, “MNF candidate hi chuan MP-a a tlin chuan BJP team NDA-a a thut tur a sawichiang a. ZPM candidate hian BJP lamah a thu dawn em tih a sawi thei lo tih a sawi. Congress candidate, INDIA Bloc-a thu tur hi BJP do ngam tur a ni,” a ti.
India democracy a nghing nasa – Lalbiakzama
