India dinhmun that hunah ngaihtuah ang ti

Congress party chuan India dinhmun that hunah reservation nuaibo a nih tur leh tur loh chu an la ngaihtuah ang a, tun erawh nuaibo hun a ni lo, tiin Rahul Gandhi, Leader of Opposition chuan a sawi.
Heng thute hi Gandhi hian khawvel huap pawha hmingthang Georgetown University a zirlaite nena inkawmna an neiha a sawi a ni.
“India dinhmun that hunah reservation nuaibo chu kan la ngaihtuah ang. Tunah erawh India dinhmun a tha lo” tiin Gandhi chuan reservation chungchanga zirlai tena an zawhna a chhang a.
“Financial number zawnga i chhut a nih chuan tribal ten 100 rupees zelah 10 paise an chang a, Dalits ten 100 rupees atangin 5 rupees an chang a, OBC te pawhin chutiang vel chauh chu an chang a ni. Thil nihna diktak chu an phu ang an tawng hmu lo a ni” tiin Gandhi chuan a sawi.
“Kan buaina ber chu India mipui 90% te chu an tel meuh lo. India rama business leader list tinte en teh u. Ka enfiah tawh a, tribal hming lang min hrilh teh u, Dalit hming lang min hrilh ula, OBC mi leh sa hming lang min hrilh teh u. Sumdawng lian 200 zingah OBC pakhat a awm ve chauh mai thei. Chung mite chu India mipui atanga chhuta 50% lawih te an ni a, mahse, a symptom te chu tihdam a nih theih nan enkawlna kan pe si lo a ni” tiin a sawi bawk a.
“Chu tak chu kan buaina a ni a. Reservation hi hmanrua awm chhun a ni lo, hmanrua dang pawh a awm” tiin a sawi bawk a.
“Upper caste mi leh sa tam tak an awm a, chung mi te chuan eng nge tihsual kan neih? Eng vangin nge hrem kan nih ang? an ti. Chung thil te chu i ngaihtuah a nih chuan thuneihna semzai chu i ngaihtuah nghal lo thei lo. Ram inrelbawlnaah mi tam thei ang ber an inhnamhnawih dan tur i ngaihtuah ngei ang. Inhawn zau i ngaihtuah ang a, in zinga tumah hi Adani emaw Ambani emaw in ni dawn lo, a chhan a awm ngei ang a, in ni ggawt dawn lo. A chhan chu kawngka a inkhar tlat a ni. Chuvang in chung zawhna chhanna chu kawng hawn a ni,” tiin Gandhi chuan a sawi bawk.
Uniform Civil Code chungchang an zawhnaah Gandhi chuan BJP tena rawtna an siam an tarlan hnuah chauh sawi a nei dawn chauh tiin a sawi a.
“BJP ten Uniform Civil Code siam an tum a, kan la hmu lo. Eng nge an kalpui dan turah hriat kan la nei lo va, tuna lo comment chuan awmzia a nei dawn lo. Rawn pholang se la chu mi hnuah ngaihdan kan la sawi ang chu” tiin a sawi.
Rahul Gandhi chuan INDIA coalition member te chuan ngaihdan inang lo tam tak an neih thu sawiin mahse thil tam berah an inlungrual tiin a sawi bawk a.
“Constitution of India chu humhim tlat tur tihah kan inlungrual a. A tam ber ten caste census neih kan duh bawk a. Sumdawng pahnih Adani leh Ambani ten India rama sumdawnna tin an thunun vek kan remti lo bawk a. Chuti chunga inlungrual lo tia min sawi chu a dik thei lovang” tiin a sawi bawk.
“Pahnihnaah chuan coaltion nih chuan ngaihdan inang lo te chu a awm ngei tur pawh a ni a, chu chu thil thleng pangngai awm ve reng tur a ni, a dik lohna pawh a awm lo. Sorkar coaltion sorkar hlawhtling takin kan kalpui fo tawh a, kan kalpui leh theih ngei pawh kan ring talt a ni” tiin a sawi bawk.