Rorel lai, BJP chuan eptu tangrual, INDIA-in November 1-a Delhi-a Ramlila Maidana electoral roll ennawn kaihhnawiha punkhawm lian tak huaihawt tur khin let dan tur an duang fel a, an hruaitu lawk tak tak thawk chhuakin kawtthlerah hun an hmang ve dawn.
Ram puma beihpui an thlak turah hian BJP hruaitu lawk tak tak leh union minister-te thawk chhuakin electoral roll special intensive revision (SIR) kalpui rintlakna leh dikzia chu vantlanga puang turin kea kawng zawh (padyatra) an huaihawt dawn a. State thenkhata chief minister-te pawh an thawk chhuak dawn a ni.
November 1-a INDIA-in Ramlila Maidan-a hun an hman rualin Uttar Pradesh Chief Minister Yogi Adityanath-a chuan Lucknow-ah padyatra a kaihruai ve dawn a. Hetih lai vek hian Assam Chief Minister Himanta Biswa Sarma pawhin Himachal Pradesh-a Shimla-a hun a hmang ang.
A tukah Telengana khawpui, Hyderabad-ah ‘padyatra’ huaihawt a ni ang a. November 5-ah Haryana-a Karnal-ah hun hmangin Haryana Chief Minister Nayab Singh Saini-a’n a tawiawm dawn nghe nghe.
Defence Minister Rajnath Singh-a leh union minister dangte pawhin SIR kaihhnawiha ‘vote ruk’ an aupui mek chhan let nan padyatra an kaihruai dawn bawk.
Maharashtra Chief Minister Devendra Fadnavis-a leh Uttarakhand Chief Minister Pushkar Singh Dhami-a te pawh kawng zawh kaihruai tur zingah an tel.
BJP-in beihpui an thlak turah hian district khawpui tinah padyatra hi huaihawt an tum a, hun an hmanna apiangah mi 10,000 tal koh khawm an tum bawk.
BJP President Nitin Nabin-a chuan beihpui an thlak dan tur duang leh ruahmanna siam tur team siamin a kaihruai a. INDIA-in an aupui mek thilte sawi fiah leh hniala an feh chhuahnaah hian electoral roll rintlakzia, SIR kalpui dan kimchang leh mipui rorelna hlutna pawimawhna pawh sawi chhuah an tum a ni.
INDIA do letin BJP hruaitu lawkte kawtthlerah che ve dawn
