India-in Canada ram chhungah Canadian tihlum, tiin puh

Canada’s New Democratic Party (NDP) leader Jagmeet Singh chuan India-in terrorist tia a puan Hardeep Singh Nijjar chu India sorkar ngeiin Canada ram chhungah a tihlum tiin a sawi.
Jagmeet Singh a NDP te chu Justin Trudeau kaihhruai Liberal minority sorkar thlawptute niin an thlawp avangin bill thnenkhatah an duh angin thil kalpui a ni ve thung.
Canadian police-te chuan Nijjar thihna kaihhnawihah mi pathum an man hnuah Singh chuan India sorkar kutthlakna a ni a ti a. “India sorkar chuan Canadian khua leh tui chu Canada ram chhungah ngei that turin tualthattu a ruai a ni. Mi pathum manin an awm tawh a, Indian agent emaw state actor he tualthahna kalpuitu te hian Canadian law an hmachhawn dawn. Canada, democracy leh free speech atan hardeep Singh Nijjar thihnaah justice a awm ngei dawn” tiin a sawi bawk.
Nikum khan Canadian Prime Minister Trudeau chuan Nijjar thihna chungchangah India sorkar a inhnamhnawih tiin a lo sawi tawh a, chu chu India sorkar erawhin awm ang lo tia sawiin a hnawl thung.
Mahse tun thlengin Canadian Police te chuan Nijjar thihna chungchangah India inrawlhna finfiahna emaw pholan a la nei lo thung.
Kar kalta Zirtawpni khan Canadian police te chuan Hardeep Singh Nijjar thihna kaihhnawiha an man mi pathum te thlalak a tichhuak thung a.
Royal Canadian Mounted Police (RCMP) chuan thuchhuah an siamah mi pathum an man te chu India mi te vek niin Karanpreet Singh, 28, Kamalpreet Singh, 22 leh Karan Brar, 22 te an nih thu sawiin Alberta a Edmonton City-ah man an nih thu an tarlang a ni.
Integrated Homicide Investigation Team (IHIT) of Surrey, RCMP chuan IHIT investigator te chuan British Columbia leh Alberta RCMP bakah Edmonton Police Service te puihna hmangin June 2023 a Hardeep Sinh Nijjar Surrey a thah a nihna kaihhnawihah mi pathum an man thu an sawi a.
Heng mi pathumte hi first-degree murder leh conspiracy to commit murder thubuai siamsak an nih thu Royal Canadian Mounted Police press release chuan a tarlang.
Hardeep Singh Nijjar chu India in terrorist a tih zinga tel niin nikum June thla khan Surrey a Gudwara atanga chhuak lai mek kahhlum a ni a. Nijjar thihna avangin India leh Canada sorkar boruakin a chhiatphah hle a ni.