India ram khawpui hrang hrangah Cricket World Cup 2023 khelh chhunzawm zel a ni a, a thlengtu India an chak tluang zel. India hian Pathianni zan khan champion lai England an hmachhawn a, champion lai lakah run 100 zeta hnehna changin vawi ruk an chak zawn ta chiah. Semi-final lut tura India dinhmun a that viau laiin England erawh chuan tlak an hnaih zel thung.
Lucknow khawpuia Bharat Ratna Shri Atal Bihari Vajpayee Ekana Cricket Stadium-a inkhelah hian inelna thlengtu India in an vaw hmasa a, over 50-ah run 229 chiah siamin, mi pakua an out a, an che tha hran lo. India chhuanvawr Virat Kohli chu run siam lovin a out ringawt a. Opener Shubman Gill pawhin run 9 bak a siam thei bik lo bawk. Kohli leh Gill te chetha lo mah se Rohit Sharma chuan ball 101 a hmachhawn atangin run 87 a siam a. Suryakumar Yadav pawhin ball 47 a hmachhawn atangin run 49 a siam a, beiseina thar an siam.
India in targer 230 an hnutchhiah hi champion lai England tan khum harsa lo tura ngaih ni bawk mah se an talbuai zui leh ta tlat thung a, over 34.5-ah run 129 chauh siamin an out vek a, India lakah run 100 ngawta tlawmin an mualpho nawn leh. England tana run siam hnem ber Liam Livingstone chuan ball 46 a hmachhawn atangin run 27 chauh a siam. India laka an tlawm leh tak vangin England dinhmun a chhe viau tawh a, semi-final lut zo lova tla luk thawthang an ni tawh.
Champion lai England lakah awlsam taka chak India hian Cricket World Cup 2023-ah vawi ruk an khel tawh a, hnehna chang vekin point 12 hmuin hma an hruai chhunzawm a, semi-final an hnaih hle tawh. Hetihlai hian champion lai England erawh chu khel ruk atangin vawi khat chiah an chak a, point hnih hmuin ram 10 inel zingah a mawngphah a ni mek thung. Inelna neih mekah hian South Africa chuan point 10 hmuin pahnihna an hmu a. Point riat ve ve hmuin New Zealand leh Australia ten pathumna leh palina an luah ve
India in England an sawp
