ICC Women’s World Cup semi-final-ah inelna thlengtu India chuan mak tak maiin champion lai Australia an hneh a, South Africa hmachhawn turin final an lut.
Hmeichhe World Cup-a hnuhma nei tha tak, vawi sarih champion tawh a champion lai ni bawk Australia hi India lakah rinkai zawk an ni a. Semi-final paltlangin final lut leh ngei tura ngaih an ni. Rinlawk ang ngeiin Navi Mumbai-ah bul an tan tha a, run 338 ze siamin India tan targer hautak an hnutchhiah.
Ball vaw hmasa Australia tan hian Phoebe Litchfield chuan ball 93 a hmachhawn atangin run 119 a vawchhuak a, a chetha hle. Khel tha pangngai tak chungin Australia hi over 49.5-ah an out vek a, run 338 an siam.
Inelna thlengtu India nulate vuak hun a thleng a, beisei phak baka chethain entu mipui mit an titlai viau a, hlim leh lawmna in India hmun hrang hrang a fanchhuak a ni ber mai. India tan hian Jemimah Rodrigues chuan ball 134 a hmachhawn atangin run 127 zet a siam a, a che tha tak zet. Out lova ding tluan Jemimah Rodrigues bakah hian skipper Harmanpreet Kaur chuan ball 88 a hmachhawn atangin run 89 zet a siam ve bawk. Rodrigues leh Harmanpreet te inkawp hian run 216 zet an thawkchhuak a, Australia laka an target chu awlsam ang reng takin an khum theih phah.
India nula te hian over 48.3-ah an mamaw run an thawkchhuak a, run 341 siamin mi panga chiah an out. Hmeichhe World Cup-ah hneh theih loh ang maia inlan thin, ram hrang hrangte huphur rawn Australia lakah hian wicket 5 ngawtin hnehna an chang ta mai a, ropui takin final an lut. India hian ball 9 ngawt hmachhawn tur la nei chungin run 341 zet an siam a, hei hi women’s one-day international ah run an siam tam ber tum a ni nghe nghe.
Champion lai Australia laka hnehna chan hi a ropui bawk a, Amanjot Kaur-i’n chakna run a vuak chhuah chiah khan India captain Jemimah Rodrigues chu lawm vangin a tap hial nghe nghe a ni.
Australia hnehtu India hian final-ah South Africa an hmachhawn zui leh dawn a, final hi Pathianni zan hian Navi Mumbai-ah khelh a ni dawn. Final-a India hmachhawn tur South Africa hian semi-final-a an khingpui England chu run 125 zetin an sawp a, awlsam takin final an lut. India hian World Cup final vawi hnih khel tawhin vanduai zawkah an la tang ve ve a. South Africa pawhin World Cup final vawi khat khel tawhin vanduai zawkah an tang ve tawh bawk. Pathianni zan final-a chak zawk zawk a vawi khat nan World Cup-ah an champion dawn a. Cricket hmeichhe World Cup in champion thar a nei dawn. An tualzawlah ngei India hian champion an tum hle ang.
India in final an lut
