India-in Iran atangin tuialhthei a lei – Oil ministry

India-in Iran atangin tuialhthei a lei – Oil ministry
Middle East-a buaina chhuak avangin Strait of Hormuz-a chetvelna a khaihlak laiin Indian thlifimtute chuan Iran tuialhthei an lei niin oil ministry chuan a sawi.
Khawvela tuialhthei lei tam ber leh hmangtu ngah ber pathumna, India hian May, 2019 atang khan Tehran atangin a lei ngai tawh lo va, hei hi US-in Iranian tuialhthei thlitfim loh lei lo tura nawr a nih vang a ni a. US-Israel tangdunin Tehran a beih avanga a lak luhna buai avangin Asia chhm lam ram hi a tuar br zingah a tel a ni.
Oil ministry chuan, “Middle East atanga lak luhna a buai karah Indian thlifimtute chuan an mamawh chu an ngah tawh a, Iran atanga lo lut pawh a tel a; Iranian tuialhthei thlitfim loh lak luhna tura pawisa pek turah harsatna a awm lo,” tiin X-ah a tar lang.
Thla hmasa khan US chuan tuialhthei tlakchhamna a ziaawm theih nan Iranian tuialhthei leh thlitfim sa leia hrekna a siamte chu hun eng emaw chen atan a hlihsak.
India chuan thla lo zawm zel turah thlitfim loh a mamawh zat ang chu a nei zel tawh dawn niin ministry chuan a sawi bawk.
“India hian ram 40 chuang atangin thlitfim loh a la lut thin a, company-te chuan sumdawnna lam ngaihtuahin hmun hrang hrang atanga lak theihna tur zau tak an nei nei a ni,” a ti.
India hian Iranian liquefied petroleum gas pawh metric ton 44,000 a lei tawh bawk a. Ministry chuan khathlang lam lawng chawlhhmun, Mangalore-ah a thil phurh chu Nilaini khan hlan thlak a ni tih a sawi.
Hetih lai hian India pan tur LPG phur lawng, Green Sanvi chuan Strait of Hormuz a paltlang leh ta niin ship-tracking platform VesselFinder chuan a tar lang.
Green Sanvi-in tuikawng paltlang harsa tak ni mek a pel leh ta hi Asia khawthlanga indona a chhuah hnua India pan tur LPG phur lawng kaltlang thei pasarihna a ni.
Hemi hma hian LPG phur lawng lian dang paruk — Shivalik, Nanda Devi, Jag Vasant, BW Tyr, BW Elm leh Pine Gas — te chuan paltlangin Indian tuipui kam an thleng tawh hlawm a. Green Sanvi hi metric ton 58,811-a rit niin a hmaa India pana LPG phur lawng lian tak takte nen pawh an phurh zat inang vel tura ngaih a ni.
Strait of Hormuz khawthlang lamah hian Indian tuialhthei leh boruakalhtheu phur lawng 15 vel tangkhang an la awm mek a, heng zingah hian India pan tur LPG phur pahnih, Green Asha leh Jag Vikram te pawh an tel.
A hmain an pahnih hian Green Sanvi nen hian inhnaih takin an awm tih hmuh a ni a; mahse, a hnu lawkah Green Sanvi hian a AIS chu on-in Qeshm-Larak crossing panin a kal a, a dang pahnih erawh an awmhmun ngaiah an la awm reng tih a lang a, hei hian kal sawn theih lohna hnaihah an la tang tih a tilang a ni.
Green Sanvi hian India-ah khawi lawng chawlhhmun nge a pan dawn tih hriat a la ni lo va. A pan tur ram signal a tihchhuahah chuan ‘India Ship India Crew’ tih message a tar lang a, hei hi indona chhuah hnu tun hnaia Indian lawngten IRGC sipaite beih an tawh lohna tura tactic hman thin a ni.