India pawm loh angin Trump-a’n Pak nena indo titawptuah inchhal leh

India pawm loh angin Trump-a’n Pak nena indo titawptuah inchhal leh
United Nations General Assembly (UNGA)-ah US President Donald Trump-a chuan thuneihna a chan hnuah indona pasarih a titawp tawh nia insawiin heng zingah hian India-in a inrawlh miah lo nia an sawi, Pakistan nena an indona pawh titawp angin a inchhal leh.
Trump-a hian Thawhlehni (India-a zan)-a UN thutkhawma thu a sawiah, “Thla sarih lek chhungin tawp thei lo indona pasarih ka titawp a ni,” a ti.
‘Indona’ a titawp nia a sawite hi Israel leh Iran, India leh Pakistan, Rwanda leh Democratic Republic of Congo, Thailand leh Cambodia, Armenia leh Azerbaijan, Egypt leh Ethiopia leh Serbia leh Kosovo te an ni.
May 10-a India leh Pakistan ramten ni li chhung an indona titawpa inkahhai an puan hnu atang khan Trump-a hian social media-ah ram pahnihte hi US-in palai hna a thawh zarah ‘inkahhai pumhlum’ an puang niin a sawi a, tun thlengin hmun hrang hrangah a sawi tawh.
India chuan Trump-a thil sawi hi a pawm lo va, inkahhai chu Indian leh Pakistani sipaite indawrna avanga awm niin a sawi a, US a inrawlhna a awm lo tih a sawi.
Prime Minister Narendra Modi-a pawhin parliament rorel inkhawmah Pakistan laka beihpui a thlak, Operation Sindoor kha titawp turin khawi ram hruaitu mah inrawlh an awm lo tih a sawi tawh bawk.
India hian April 22-a mi firfiakten Jammu & Kashmir-a Pahalgam-a mi 26 an thah phuba lain Pakistan helho a bei a, Islamabad-in a chhang let a, ramri-ah ni li an indo hman a ni.
Pakistani Foreign Minister Ishaq Dar-a pawhin India tanna lam hi hawiin Al Jazeera hnenah ‘India-in ram dang inrawlhna a pawm ngai lo’ niin a sawi a. “Mi dang inrawlh vena lam kan ngaihtuah lo va, India hian ram pahnih thil bik chauhvin a kalpui a ni,” a ti bawk.