Dalit Kristian leh Muslim-te tana scheduled caste nih theih lohna dan siam tawh chu thiah a nih theihna’n India rama Kristian-te chuan August 10 hian National Protest Day an hmang dawn a. Ngenna an dawn angin Mizoram Presbyterian Kohhran chuan August 10 (Ningani) zing tawngtai inkhawmah he dan hi thiah a nih theihna’n tawngtai thupuia hmang turin tualchhung kohhrante a ngen.
National Council of Churches in India – Dalit & Tribal/ Adivasi Concerns, Catholic Bishop’s Conference of India, National Council of Dalit Christians ten thuchhuah intawm an siama tarlan a nih danin, kum 1950 khan scheduled caste (SC) chungchanga India President thupek ‘Scheduled Caste Order’ siam takah Dalit-te chu Kristian emaw Muslim emaw an nih chuan SC-ah chhiar tel an ni loang, tih a ni. Hei vang hian Dalit Kristian leh Dalit Muslim chu SC-ah telh an ni ta lo a ni.
An sakhaw rinna avang ngawta SC-te hamthatna dawn theih loh chu a dik lo a. India Danpui Article 14, 15, 16 leh 25 kalh a ni, tiin, kum 2004 atang khan kohhran pawl leh mimal pawhin he thupek hi ngaihtuah tha leh turin an lo ngen tawh thin a, India danpui palzutna a nih dante sawiin, miin a sakhaw rinna avang maia a dikna leh hamthatna chanvo tam tak a hloh ngawt chu a dik lo tih hailan tumin nasa zawka hma lak tan a ni.
Kumin April 12 khan Supreme Court of India chuan an ngenna hi ngaihthlak sakin, hemi chungchanga court-a thu thehluh tawhte lakhawma zirchiang tur ukil rual – nodal officers a ruat a; an ni hian an thu zirchiante hi July 11 khan an thehlut tawh a, Supreme Court hian an thu thlente ngaihthla turin hemi ni hian hun a pe hman loa, a hun hi pawhsei niin, a la inchiah mek a ni.
Kumtin August 10 hi he dan duh lohna lantirin National Protest Day-a hman thin a ni a. India rama kohhran leh Kristian pawl hrang hrang chu National Protest Day hmang tur hian thuchhuah siamtute hian an ngen a ni.
India rama Kristian ten Protest Day hmang dawn
