Indian Army chuan India leh Russia ramten ralthuama inremna an neih angin kumin chhungin AK-203 assault rifle 70,000 a dawng dawn a, nakumah nuai khat dang a dawng leh dawn bawk niin defence chuan a puang.
Ralthuam inhlanna tur hi Mosow nena inremna lian tak siam hnuaiah a ni a, Indian sipaiten khawvel ralthuam tha leh rintlak a neih theihna tur a ni a. Indian Army hian nikum khan hetiang silai hi 35,000 a lo dannw tawh bawk.
AK-203 hi Indo-Russian thawhhona hnuaiah Uttar Pradesh-a Amethi-ah siam a ni a, kum rei tak an lo hman tawh, INSAS (Indian Small Arms System) rifle thlak nan hman a ni dawn.
AK-203 rifle-a a bungrua (part)-te hi tam tak chu India siam niin kuminah hian siam chhuah 30%-a tihpun a ni ang a, hei hian siam pum a tichak lehzual dawn tih army thuneituten an sawi.
A pianhmang a tha a, a tlo va, hmun hrang hranga hman theih a nih avangin AK-203 sila an nei tur hian India hi raldonaah pawh a tihchak sawt beisei a ni a. A bikin firfiaka chete beih letna leh indona tak takah pawh an tangkaipui hle rin a ni.
AK-203 hi Kalashnikov series-te tihchangkan niin a kah a dik a, a zang a, thiamna thar ber bera thuam a ni.
India hian ‘Make in India’ tih thupui neiin ram venhimna hmanruaah pawh a kutkawih ngei a tam thei ang hman a duh angin silaite pawh hi Indo-Russian Rifles Private Limited (IRRPL)-in an siam vek tur a nih thu Defence Ministry thuneitute chuan an sawi a. Hei hian India chu ralthuam siamah pawh ama kea a dintir piah lamah Russia nena ralthuama an inkungkaihna pawh a tinghet dawn nia sawi a ni.
AK-203 contract hi July, 2021-a ziah kha niin Rs vaibelchhe 5,000 chuang a ni. Nuai 6.1 siam chhuak turin IRRPL leh Rosoboronexport (RoE) thawhhona siam niin he inremnaah hian Russia-in a technology pawh India kutah a hlan tel.
70,000 chu a thawh khat nan Indian Army hnenah January 25, 2022 khan hlan tawh nia sawi a ni a. Siam chhuah phalna hi January, 2023-a tihchhuah chauh kha a ni thung a. May leh July, 2024 khan rifle 35,000 dang hlan leh a ni bawk.
Line of Actual Control (LAC)-ah China nen an inep fo avang leh Pakistan nen ramri kâna an intihbuai fo avangin Indian Army chuan a hmanrua tihchangkan hi a enghelh hle thin a ni.
India sipaiten AK-203 rifle 70,000 dawng hnai
