Kumina National Eligibility cum Entrance Test exam zawhna leak out leh exam dang zawhna leak out kaihhnawiha Union Education minister bang tura phutna leh India ram education system siamthat duhin Nilaini khan Aizawlah zirlaiten punkhawm an huaihawt a. Political party-te pawhin an thlawpna thu an tichhuak. NEET exam paper leak out thu kal zela lungawilohna leh sawrkar laipui laka thil phut neituten India ram khawpui New Delhi bakah khawpui hrang hrangah tunlai hian tharum tel loa punkhawm huaihawt mek zel a ni a. Mizoramah pawh mi thahnemngai zirlai leh zirna kalphung tha zawk duhtute intelkhawm huaihawtin Aizawlah punkhawm huaihawt a ni.
Thusawitu hrang hrangten NEET exam zawhna leak out tuartu zingah Mizo thalai tam tak an tel avangin hei hian thuk takin Mizote pawh min nghawng tih an sawi a. Central-a BJP kaihhruai sawrkarin education system a kalpui dan leh kalpui a tum dana tha lo an tih lai pawh sawichhuakin, siamthat a tul thu an sawi a ni.
Pungkhawmte hian darkar 4 chuang hun an hmang a. Social activist, university zirtirtu, university leh college zirlai bakah a hnuailam zirlai atangin an lungawilohna leh siamthat an duhna lai auchhuahpuiin, punkhawmna pui ber New Delhi-a zirlaite punkhawm chhan chu an thlawp tih an sawi a, an thlawp zia lantirin an aurual bawk.
Punkhawm hi political party lam pawhin an thlawp tih an sawi a. Sawrkar lai ZPM Media chairman, minister B Lalchhanzova chuan thuchah siamin, India ramah thalai, zirlai maktaduai tam takin NEET examination question paper putru avanga harsatna leh manganna an tawk mek a. Aizawla zirlai pungkhawm zinga tam takin ‘professional course’ an neihna turin an bei a. India ram laili chauh ni lo, keini state te pawh min nghawng a, a pawi hle tih a sawi a ni.
Zirlaite hun leh sum hloh, an rilru a thalo zawnga a nghawngna avangin pawi a tih thu sawiin, “ZPM chuan he thil thleng hi pawi kan ti a, nu leh pa tam tak rilru a na a. Chutihrual chuan buaina siam lo zawnga zirlai rilru dik puten an dikna chanvo atana an beihna hi kan thlawp tlat a ni,” a ti.
Zirlai thalaite manganna chu thinlung takin ZPM chuan a tawrhpuiin an hriatpui tih a sawi a. ZPM sawrkar chuan theihtawp chhuahin dik takin police lak dan bakah office hna lakah pawh a dik thei ang bera kalpuiin, siamthat ngai leh tihdik ngai la awm chu a tha thei angin an kalpui zel dawn tih a sawi a ni.
MNF Gen. Hqrs. chuan thuchhuah siamin, Mizo thalai rualin an dikna chanvo humhalha atana huaisen taka an penchhuak chu an thlawp a. Zirlaiten an chanvo thuneihna hmanga rahbeh sak an duhlohna leh hemi avanga tuartute thlavang an hauhsak chu an tih tur dik tak ti ah an ngai a, huaisen taka thudik tungdinga pen zel turin an chah tih a sawi.
Rim taka zir a, theihtawp chhuahte dikna chanvo tihbawrhban sak an ni thin chu India ram kalphung diklo lian tak a ni tih sawiin, ‘Thudik tundin duhna leh sual huatna hi Mizo nationalism laimu a ni a, huaisen taka ram leh hnam tana penchhuah hi kan nationalism kawngpui a ni. Thalai rual heti zat chutiang tingam tur penchhuak an awm hi a thlamuanthlak takzet,’ a ti.
Zirlaite chanvo tihbawrhban kawngah tunnhnaiah MPSC hnuaiah pawh sawi tur a awm nual chu pawi an tih thu MNF hian sawiin, sawrkarin zirlaite rilru thianghlim tak hmanga thudik tundin an duhna hi hrechiangin, thil diklo awmte chhuichiang a, hma la nghal turin an phut tih a sawi a ni.
‘He punkhawmna hian kan hmalama Zoram ti eng se, India ram pawhin Mizoram thalaiten sual an hua a, nawmsipbawlna hmanga kan ram suasam an remti ve lo a ni tih lo hre mawlh se kan duh a ni,’ a ti.
National Student Union of India (Mizoram) pawhin, NEET leh exam dang engemawzata paper leak nasa tak avang leh, hemi kaihhnawiha India ram zirlaiten lungawilohna an lantir mek leh, zirlai pungkhawmten an phut – Union Education minister Dharmendra Pradhan ban tir, paper leak victim zirlaite hnena zangnadawmna cheng vaibelchhe 1 pek, Indian education system siamthat chu an thlawp tih a sawi.
‘India ram hmun danga lungawilohna lantirtu zirlaite thlawpa Mizoram zirlaiten hma an la leh, punkhawm an buatsaih hi NSUI (Mizoram) chuan kan thlawp a. Tuma fuihpawrh ni loa, dikna leh siamthat duhna avanga huaisen taka penchhuak zirlai zawng zawngte kan chhuang takzet a. Zirna humhalh tura huaisen taka penchhuak zel turin kan ngen bawk,’ a ti.
Indian education system siamthat duhin Aizawlah zirlai pungkhawm
