Indian football-in buaina a tawk AIFF president ban phuttu Bhaichung

Tunkar tir lam Thawhlehni khan All India Football Fede-ration (AIFF) executive commi-ttee chuan inrintawklohna (breach of trust) chhuanlamin Shaji Prabhakaran chu secretary general post atangin an pet-chhuak leh ta a; thla hnih chuang liamta nikum November ni 7 khan AIFF emergency commi-ttee chuan secretary general hi he chhuanlam avang bawk hian an lo ban tawh a; a tum hnihna atana inbanna lian a thlen hnu hian national captain hlui Bhaichung Bhutia a tawng-chhuak a, Indian football administration huanga buaina awm chu AIFF president Kalyan Chaubey mawh niin a ngai a, bang ve nghal turin a phut tih a sawichhuak.
Rin tawk lohna chhuan-lama Prabhakaran an han ban kha Delhi High Court single bench chuan ngaihtuahin, nikum December ni 8 khan AIFF-in secretary general banna chu a thiat lailawk (interim stay) a, Prabhakaran pawh chuan a hna ngai a han zawm leh lawp lawp a!
High Court chuan tun January ni 19 khan Indian football federation thiltih danah thuchhuah thar tichhuak lehin, AIFF constitution-in secretary general ban theitu chu executive committee chauh a nih thu a tarlan laiin Prabhakaran bantu chu emergency committee a nih thu a tarlang.
He court vek hian December ni 8-a ‘stay order’ a tihchhuahin AIFF tan Prabhakaran ban tura executive committee meeting koh a dal lo tih a tarlang tel a, chuvangin, AIFF hian Prabhakaran banna an tichhuak leh ta a ni.
Thawhlehnia Prabhakaran banna agenda ngaihtuah tura AIFF executive committee meeting kohah khan an president ban phuttu Bhutia a tel a; a chungchang an ngaihtuah ber Prabhakaran erawh a tirah committee kohna an pe lo zet a, a hnuah a hmuna mahni inlan loa online kaltlanga tel ve an phalsak thung.
Committee meeting an zo a, Bhaichung Bhutia chuan PTI hnenah meeting boruak leh a ngaihdan sawichhuakin, “Executive committee member-te hnenah Kalyan Chaubey leh treasurer Kipa Ajay-te pawh an inhnukdawk ve ngei tur a ni tih ka hrilh. Shaji Prabhakaran chauh hi kan mawhpuh tur a ni lo. An pathum hian executive committee pawmpui lohin thutlukna an lo siam a, mawhphurhna inang an la vek tur a ni.
“Shaji hi kan ban a nih chuan president leh treasurer pawh an him bik tur a ni lo.
“Indian football-in buaina a tawk mek a, he sport-ah hian politik a lut a, kum khat chauh an hna an chelh laiin insih neuh neuhna a awm a, chu chu a tha lo. National team pawhin a tuar a, Hangzhou Asian Games leh team tana training duhthusam pawh neih theih lohna Asian Cup lamah pawh kan thlen chin chu khati mai mai kha a ni,” tiin legendary striker chuan Indian football administration chhunga harsatna awm a sawichhuak piap piap!
Media lama tarlan danin, Prabhakaran khan an banna chhan bulpui leh an puhna, amaha rinna an hloh (breach of trust) chhan sawifiah turin executive committee member-te a ngen a; member-te hnenah chuan sum lama hminghliauna leh pawl sum tihchingpen a neih loh thu hrilhin, amah bantu hmasa AIFF emergency committee pawh din a nih loh thu leh chuti chung chunga emergency committee hminga ban a ni kha thil theih a nih loh thu a sawi niin tarlan a ni.
Thu lakna pakhat chuan president nena an inkar boruak a kehchhiat dawn tho tho avangin ban tawk lo mah se ama duhthu ngeiin Prabhakaran chuan banna thehluh tho tho a tum tiin a sawi.
Kum 2022 AIFF presidential poll-a tling zo ta lo Bhutia chuan Prabhakaran tan zawngin thu a sawi chhunzawm zel a, Prabhakaran an ban chhan, secretary general rin zawh lohna kha engtia lo insiam nge a hriat loh thu sawiin, “Kei ngei pawh hi executive committee mem-ber ka ni a, Shaji laka rinna kan hloh chhan leh chuti anga rin ngam loh tur khawp thil a tih hi ka hre lo. Chumi chungchang chu hrilh ka ni lo a, a sawifiahna pawh ka dawng lo,” a ti.
Bhaichung hian federation chhunga langtlang (transpa-rency) kalpui a nih theihna’n AIFF annual general emaw executive committee meeting emaw chu mi zawng zawng lo thlir theih tura live-a pekchhuah (live streaming) a rawt tih sawilang telin, “Tunlai khawvelah chuan Supreme Court leh High Court case hearing-te thlengin an live tawh a, AIFF AGM or executive committee meeting kan live ve loh chhan harsatna hi eng chiah nge maw ni le ka ti a, chuvangin, AIFF meeting reng reng live streaming turin ka rawt a ni,” a ti.
Doha khawpuia AFC Asian Cup khelh mek group stage paltlang zo loa Indian team tlak chungchang Sikkimese Sniper hian tarlang telin, “Asian Games leh Asian Cup-te hi India tana tournament pawimawh ber ber pahnih a ni a, khati lek kan thlen chhan kha player-t eleh coach vang ni loin AIFF chhunga a lawk ber ber (top brass)-te vang a ni.
“Asian Games-ah khan kan team chuan Hangzhou an thlen atanga darkar reilote liam hnuah an match hmasaber an khel chawpchilh nghal a; Asian Cup-ah ni se duhthusam training-na hun pawh kan siamsak lo,” tiin AIFF hotu lawkte thiltih dan a sawisel siah siah!
He boruakah hian AIFF executive committee member leh Mizoram sports minister ni bawk Lalnghinglova Hmar chu Prabhakaran ban chungchanga a ngaihdan zawh a ni a, Thawhlehni executive committee meeting a tel hman loh avanga AIFF chhung boruak a hriat vak loh thuin Post Sport zawhna a chhang.
AIFF vice-president NA Haris thung chuan secretary general ban vel chungchangah court thu kal lai chhuanlamin India media-te hnenah engmah a sawichhuak duh lo thung.