Indian lawngten Strait of Hormuz an kaltlang theih nan Iran dawn

Indian lawngten Strait of Hormuz an kaltlang theih nan Iran dawn
India chuan Iran thuneitute nen India flag tar sumdawng lawng 30 velin him taka Strait of Hormuz an kal theihna tur ruahmanna siam nan an indawr mek niin hemi chungchang hretute chuan an sawi a. He tuikawng pawimawh tak hi Israel leh US tangdun nena an inkar boruak avangin Iran-in an khar mek a ni.
Chawlhkar tam vak lo liam ta chhung khan Iran-a Islamic Revolutionary Guard Corps (IRGC)-in Persian Gulf-a tuialhthei leh bungraw phur lawngte an beih hnuah Indian Navy venhimna (escort) hnuaia sumdawng lawngte him taka an kal theihna tur ruahmanna siam chu ngaih pawimawh ber a ni tih an sawi a. Tun thlengin tuipuia hnathawk Indian pathum an thi tawh a, lawng pathum beih a nih avangin mi dang pakhat chu chin hriat lohin a awm bawk nia sawi a ni bawk.
Mi pakhat chuan, “Inbiakna a kal zel a, thil tihfel a la ni lo,” tiin Ningani khan a sawi.
India flag tarna lawng leh India pan tur sumdawng lawngte himna hi Thawhlehnia External Affairs Minister S Jaishankar-a leh Iranian Foreign Minister Seyed Abbas Araghchi te phone-a an inbiaknaah khan an sawi nia hriat a ni a. Hei hi February 28-a Iran leh US inkara buaina a chhuah hnua an inbiakna vawi thumna a ni.
External affairs ministry thupuangtu, Randhir Jaiswal-a chuan kar tina thuthar lakhawmtute a kawmnaah Ningani tlai khan, “Tun hnaiah external affairs minister leh Iran foreign minister hi vawi thum an inbe tawh a, a hnuhnung berah hian lawng himna leh India-in energy a neih theih dan tur chungchangte pawh an sawi dun a. Chubak thil dang sawi nan erawh a la hma deuh rih,” a ti.
Indawrna a awm mek tih sawitute hian ni li ni nga kal ta chhung khan Iran-in India flag tar sumdawng lawng pakhat mah Strait of Hormuz paltlang a phal lo niin an sawi a. Ningani khan Suezmax tanker Shenlong, Saudi tuialhthei thlitfim loh phur chu Strait of Hormuz a paltlang hnuah Mumbai a thleng a. Liberia flag tar lawng hi February 28-a indona tan a nih hnua Asia khawthlang atanga India-a tuialhthei phur thleng hmasa ber nia hriat a ni.
Shipping Ministry Special Secretary Rajesh Kumar Sinha-a chuan minister leh minister indawrnaah Indian thuneitute chuan India flag tar lawng 24 chu uluk takin an vil mek tih a sawi a, tunah hian strait chhim lamah lawnga thawk Indian 677 an awm a, tuikawng pawimawh tak hmar lamah 101 awmna lawng dang pali an awm bawk tih a sawi.
“India lawng zawng zawng leh an thawktute chu an himna atan uluk takin an vil reng a ni,” tiin Sinha-a chuan a sawi a, tun hnaia ‘tuipuia thil thleng’-a inhnamhnawih ram dang flag tar lawngah Indian thawktu 78 an chuang tih a sawi bawk a. Heng thil thlengah hian thawktu pathum an thi a, pakhat chin hriat loh a ni a, mi pali dangin hliam an tuar bawk niin a sawi.
Nilaini khan India chuan IRGC-in Gujarat-a Kandla lawngchawlhna pan tur Thailand flag intar lawng a kah avangin sumdawng lawngte beih a ni chu a dem thu a sawi a. Mayuree Naree-a thawk 20 chu chhanchhuah an ni a, pathum dang chin hriat loh an nih thu a sawi a. External affairs ministry chuan, “Asia khawthlanga buaina kal mekah hian sumdawng lawngte chu sipaiten an bei hi India chuan a pawi a ti hle a ni,” a ti.
“India chuan sumdawnna lawng liante beih leh pawisawi lo thawktute hlauhawma siam emaw, zalenna leh sumdawnnaa zalenna tihbuai emaw hi pumpelh a tul tih a sawi nawn leh a ni,” tiin thuchhuah chuan a tar lang bawk.
Iranian foreign ministry chuan March 10-a Jaishankar-a leh Araghchi-a phone-a an inbiak chungchanga thu a chhuahah US leh Israel sipaite beihpui thlakin Strait of Hormuz-a lawngchawlh hmuna a nghawng chungchang an sawi tih an tar lang.
“Araghchi-a chuan Persian Gulf-a lawngchawlh hmun dinhmun him lo leh harsatna lo awm hi US-in chetna leh muanna a tibuai vanga lo awm a nih thu a hriat nawntir a, khawvel pumin he thilah hian US chu a mawhphurtuah a puh a nim” tiin thuchhuahah hian tar lan a ni bawk.
Iran-in Persian Gulf leh Gulf of Oman inkar tuikawng, khawvel a tuialhthei leh boruakalhthei phurh 20% vel kaltlangna, Strait of Hormuz a khar hnuah khawvel puma tuialhthei leh boruakalhthei man a sang hle.
Jaiswal-a hian Iran-ah Indian 9,000 vel an la awm tih a sawi bawk a, sorkar chuan India-a kir duhte chu khawmual ramri kâna Azerbaijan leh Armenia pana an haw theih nan a pui mek tih a sawi a. “Heng Indian 9,000-te hi zirlai, tuipuia thawk, sumdawng, professional leh biakzin thenkhat an ni,” a ti.
Thuneitute chuan India mi eng emaw zat, zirlai leh pilgrims telin, Tehran atangin Iran-a hmun him zawkah an sawn chhuak tawh a ni.