Thawhtanni khan China ram khawpui pakhat Chengdu-a World University Games-ah India shooters leh compound archers chuan medal paruk kapchhuakin, an zinga pali chu gold medal a ni nghe nghe.
Shooter rualkhat – Aishwary Pratap Singh Tomar , Divyansh Singh Panwar leh Arjun Babuta-te chuan tualchhung thalkap thiam rual awpbetin 10m air rifle men’s team gold an la a; India trio hian a pumpuiah point 1894.7 score-in, Chinese Li Xinmiao , Song Buhan leh Zhu Xiaozhong (1881.9) an hmakhalh a, yellow metal awrhin, Kazakhstan chu pathumna an ni.
Aishwary leh Divyansh-te chuan 10m air rifle men’s individual event lamah pakhatna leh pahnihna (one-two finish) hauh ve bawkin, Avneet Kaur chuan USA mi Alyssa Grace Sturgill hnehin compound women’s individual gold a awrh ve bawk.
Sangampreet Bisla (gold) leh Aman Saini (bronze medal)-te chuan men’s individual event-ah India tan medal an thawkchhuak a; Sangampreet leh Aman hi Pathiannia bronze medal hlawhchhuaktu India men’s team zingah an tel bawk.
He thu buatsaih lai thlengin India hian medal 17 la tawhin, chu’ng zinga pakua chu gold a ni a, silver pathum leh bronze medal panga tel bawkin, medal standing-ah Japan nen pahnihna an ni dun mek.
Hmahruaitu leh a thlengtu ni bawk China chuan medal 21 an hui tling tawh.
Indian shooter leh archer rual chetha
