Indona avangin Goma a buai, mihring tan khawsak a harsa

Indona avangin Goma a buai, mihring tan khawsak a harsa
UN hnuaia tanpui hna thawktute chuan Congolese khawpui, Goma-ah mihring tana khawsak ngaihna awm lo khawpa buaina a thleng thuai dawn niin an sawi a, damdawi inte chu ruang leh hliam avangin an khat vek a, khawlaiah ruang a let remrum bawk.
UN refugee agency, UNHCR chuan mi sang tam takin ‘indona hmun eng emaw zat’ an tlanchhiatsan tih a sawi.
M23 helhovin khawpui thunun an tum avanga indona chhuak mek karah hian ei tur leh damdawi dahna inte chu rawk a ni tih tanpuitu pawlte chuan an sawi.
M23 hmalakna avang hian thinrim an tam hle a, indona titawp tura inbe tura nawrna a nasa hle.
“Damdawi in a khat a. Mi za chuang an awm mek a, a tam ber chu silaia kah hliam an ni,” tiin World Health Organization-a emergency response coordinator for the Democratic Republic of Congo Adelheid Marschang chuan a sawi.
Geneva-a thuthar lakhawmtute an kawmnaah International Committee of the Red Cross (ICRC) chuan Goma-a damdawi inah darkar 24 lek chhungin hliam 100 chuang an dawng hman a, thla khat chuang chhunga an dawn thin aia tam niin a sawi.
Thawktute chuan lirthei hunna chu damlo awm nan an siamchawp niin an sawi bawk.
Mihring bikna laia laipui hmanga inbeihna chuan hliam tuar a titam zual a, a bikin naupangin an tuar nasa tih an sawi.
ICRC leh World Food Programme chuan tun hnaiah an kumdamte chu rawk a ni ve ve tih an sawi.
Thawhlehni khan Kinshasa-a M23 kal zelna an ngaihven loh avanga mipui thinrim pungkhawm chuan French embassy thenkhat an hal a. Khawlaiah an chhuak khawm a, lirthei ke halin lirthei kal vel pawh an tibuai nasa hle.
French Foreign Minister Jean-Noël Barrot chuan an embassy-in beih a tawk chu ‘pawmzam theih loh’ tiin a sawi a, kangmei chu thelh a ni tawh tih X-ah a tar lang.
Rwandan, Ugandan, Belgian leh US embassy-te pawh beih a ni a, building thenkhat chu rawk a ni a, police-in pungkhawmte chu tear gas-in an hnawt darh.
AFP news agency chuan Thawhtanni atang khan Goma-ah hian mi 17 vel an thi tawh a, mi 400 dawn hliam tuar an awm tawh tih damdawi inin an chhinchhiah tih a tar lang a. Vantlang pawlte erawh chuan thi hi 25 an ni tawh niin an sawi.
Thawhlehni khan South Africa chuan DR Congo-a muanna vawngtu tura sipai a dah zinga pali chu M23 nen an inbeihnaah an thi leh tih an sawi a. Hengte nen hian South African sipai 13 an thi tawh a, Malawi leh Uruguay pawhin sipai an chân tawh.
South Africa President Cyril Ramaphosa chuan Thawhtanni khan Rwandan President Paul Kagame biain inkahhai a tul thu leh muanna tura inbiak chhunzawm a ngaih thu an sawi.
African Union pawhin Thawhlehni zan khan thutkhawm hmanhmawh a ko bawk.
Thawhtanni tlai khan DR Congo President Félix Tshisekedi pawhin Goma thil thleng sawiho hian an ram mi pawimawhte a ko khawm a. “Kan sipaite leh sipai puitu, Wazalendo chuan khawpui hi an la luah zel,” tiin National Assembly Speaker Vital Kamerhe chuan an thukhawm zawhah a sawi.
Zirtawpni atang khan Goma-ah hian electric leh tui a awm tawh lo va, Kamerhe chuan an neih leh theih nan sorkarin hma a la mek tih a sawi.
Sorkar hian palai tirh buaina hmeh mih dan tur a ngaihtuah reng tih a sawi bawk.
US Secretary of State Marco Rubio chuan Tshisekedi biain M23 chetna chu a dem thu a hrilh a. US State Department-in thuchhuah a siamah Congolese hruaitu hian muanna atana hel thlawptu, Rwanda nena inbiak chhunzawm a inpeih tih a tar lang.
Rubio hian Kenya President William Ruto pawh biain inbe zui turin a ti a. Kenyan hruaitu hian Tshisekedi leh Kagame te hi Nilainia inbe turin ruahmanna a siamsak.
Congolese sorkar pawhin UN Security Council thutkhawm ko turin a ngen a, a hma aia na zawk Rwanda laka che turin a ngen.
Pathiannia UN thutkhawm hmanhmawhah khan DR Congo hian Rwanda hrek a duh thu a thlen a, an sipaiten an ram chin an dai lut niin a sawi.