Indona vangin lei thaah India buai mek

Indona vangin lei thaah India buai mek
Middle East-a indona avanga lawng kalna kawng a buai avangin India-in leitha a hmuh thin ang hmu lovin harsatna a tawk mek a, hei hian thar chhuah tlem leh a man sang zawk a hrin hlauhna a lian hle.
China dawta khawvela lei tihthatna hmangtu lian ber, India hi lei tihthatna siamna tur leh siam sa lak luhnaah a innghat nasa hle. A lak luh tam zawk hi Gulf atanga a lak, tuna khar mek, Strait of Hormuz paltlanga a lak a ni.
Prime Minister Narendra Modi-a chuan a sorkarin an mamawh lak luh a buai loh nan leh lo neitute a nghawng lohna turin hma a la tih a sawi.
Mi thiamte chuan tuna an kawl sa mekte hi thlai chin hun lo awm tur atan a tawk niin an sawi a; mahse, indona a awm zel a nih erawh chuan thil a danglam danglam thei tih an sawi.
India-a hman lar ber, nitrogen fertilizer, urea ang chi hi buh telin, thlai chi hrang hrangten boruak atanga nitrogen an mamawh ang an lak luh theih loh avanga puih nan lo neituten an hmang nasa a, thar tam turin an tan a pawimawh hle a ni.
India hian kum tin urea ton maktaduai 40 vel a hmang thin a, hei hi sorkarin man tlawma a hralh thin a ni a. Lak luhna a buai chuan thlai chin a nghawng thei a ni.
Buh thar tam ber ber, Punjab leh Haryana hmarchhak-a lo neitute chuan an thlai chin hun pawimawh, June-July vela hnaih tawh avangin an rilru a kam hle hlawm a. May thla vel atangin urea hi an lei tan thin tlangpui.
Tun dinhmunah hian cooperative bakah thil siamtu leh distributor-te enkawl kudam kaltlangin lei tur a awm a; mahse, hma lam hun zel erawh sawi lawk a har rih.
Punjab Agricultural University nena inzawm, lo neitu hruaitu pakhat, Manpreet Singh Grewal-a chuan, “Indona hi a chhunzawm zel a nih chuan eng chen nge kan khawl sa hi a awm dawn tih kan hre lo,” a ti.
Sorkarin a tar lan dan chuan March 19 thleng khan India-ah urea ton maktaduai 6.2 vel a awm a ni.
June leh September-a fur hun chhungin lei tha hman a tam ber a, dan pangngaiah chuan tuna kawl sa mek hian a daih thei dawn niin mi thiamte chuan an sawi.
Mi thiam thenkhat chuan buaina a awm chhunzawm zel chuan dinhmun a chhe zual thei niin an sawi.
Sorkar laipuia agriculture & farmers’ welfare secretary thin, Siraj Hussain-a chuan buaina hian India-a a nghawng ngei dawn nia sawiin, “Sorkar hian fur atan urea leh lei tha dang tlakchhamna awm theiah a inbuatsaih ngei a tul,” a ti.
India hmun tam takah chuan lo neitute hian a nih dan tura hrilh aia tam urea an hmang tih a sawi a, ‘thlaiin a dawn theih aia tam nutrient’ an hmang a ti a ni.
Fertilizer company pahnih executive, an hming tar lan duh lote chuan buaina hi a awm zel a nih chuan season tawp lamah tlakchham a awm thei tih an sawi bawk.
Urea siam naa hmanraw pawimawh ber chu natural gas a ni a, hei pawh hi India hian 85% vel a la lut a, a tam zawk hi Gulf atanga thova a lak luh a ni.
India-a fertilizer plant-te chuan tun thla tira sorkarin thupek a tihchhuah hnuah tunah hian boruakalhthei an mamawh 70% vel chauh an hmu rih mek a. Hei vang hian thil siamtu thenkhat chuan thil an siam tlem phah hle nia sawi a ni.
Modi-a chuan ram danga innghahna tihziaawmna turin ram chhunga leitha siam tihpun leh lak luhna dang dap turin India chuan hma a la tih a sawi.
Nilaini khan Agriculture Minister Shivraj Singh Chouhan-a chuan thuneitute hnenah lei tha pek chhuah chu dik tak leh chatlak awm lova kalpui tura hma la turin a ti.
Tunah chuan buaina hian eng chen nge a awh dawn tih hriat a ni lo va, mi thiamte chuan bungraw inthawn hi a pangngai ang a nih chuan chawlhkar tam vak lo hnuah thil a pangngai leh mai thei dawn niin an sawi.