Indonesian president leh Modi inkawm, thawhhona tur siam

Indonesian president leh Modi inkawm, thawhhona tur siam
India leh Indonesia tam chu hriselna, ram chin dan thin damdawi, tuipui himna leh venhimna, hnam nunphung intihpawl leh digital tihhmasawnna kawngah thawhho an tum.
Inrinni khan India-a cham mek, Indonesian President Prabowo Subianto leh Prime Minister Narendra Modi chu New Delhi-ah inkawmin thawhhona tur hrang hrangte hi an sawi dun a. 3rd India-Indonesia CEO forum report pawh pek an ni.
An pahnih leh ram pahnih aiawhte an inbiak zawha thuchhuah a siamah Prime Minister Modi chuan President Subianto-a nen hian thil tam tak sawiin thawhhona turte pawh an duang tih a tar lang.
Kum 2018-a Indonesia a tlawh tum khan Comprehensive Strategic Partnership an lo siam tawh tih tar langin Modi chuan, “Ram venhimna lama kan tanho zel theih nan India leh Indonesia hian Defence Manufacturing & Supply Chain hmanga thawhho kan tum a ni,” a ti.
Ram pahnihte hi tuipui himna tur te, cyber ​​security-ah te, mi firfiak beihna kawngah te leh thil la vawng thin mite laka himna an duh ve ve tih Modi chuan a sawi a. An pahnih hian FinTech, artificial intelligence, internet leh digital thilah nasa zawka tan dun zel an tum tih a sawi.
India hian hriselna leh ei tur ram mipuite hnena a sem darh dan, Mid-Day Meal Scheme leh Public Distribution System te pawh a kalpui dan Indonesia hi a hrilh bawk.
Modi-a chuan India leh Indonesia ramte hi kum sang chuang lo inkawmngeih tawh an ni tih a sawi a. Ramayana leh Mahabharata-a thawnthu leh ‘Bali Jatra’ te chuan ram pahniha mi chengte hi nun dan phung leh chanchin hlui atang tawhin inzawmna thuk tak an nei tih a sawi.
Prime minister hian Indonesia chu India-in ASEAN leh Indo-Pacific region-a a kawmngeih tak a ni tih sawiin heng lai hmuna himna, muanna, than duanna leh dan behchhana thil kalpuina kawnga a thawhpui tha a nih thu a sawi.
President Subianto pawhin India a tlawh hmasak bera an lo dawnsawn dan chu ropui a tih thu a sawi a. Modi-a nen an inkawmnaah hian ngaihdan thuhmun tam tak an nei a, kawng hrang hranga tan lak dun leh thawh dun dan tur an duang tih a sawi ve bawk.
Subianto-a hi Ningani zan khan India tlawh tur hian a thleng a, Pathiannia India-in ama puala danpui a neih champha lawmna inkhawm lian ber, New Delhi-a hmanah khual lian a ni nghe nghe.