Infak leh insawisel

Tun hnaia Remna Ni champha lawmnaa home minister Pu K. Sapdanga’n remna leh muanna a awm theihnana Pu Lal Thanhawla inpekna a chawimawi nawn tih a sawi chungchangah, nimina MPCC political session neihnaa thu sawitu MPCC president Pu Lal Thanzara chuan home minister chu lawmthu a hrilh tih a sawi chhuak a. Remna Ni lawmna neihah mi tam tak chuan Pu Lal Thanhawla hming lam rik an hreh thin niin MPCC president hian a sawi bawk a ni.
Tun hma deuh kha chuan, political party hruaitute emaw, party worker-te emaw hian, party dangte thil tih that infak sak hi an hreh thin niin a lang. Infak an hreh mai pawh ni lovin, fak tlak ngawih ngawihte pawh sawi hnawmna an inzawnsak a, party dangte thil tha tih fak chu sawi loh, insawichhiatna tur hi an inzawnsak ngar ngar a, mipuiin an hmuh tleuna tur zawngin a mualpho thei ang bera inchhuah chu an hna pui ber emaw tih mai turin an khawsa thin.
Tun hnuah hi chuan, party hruaituten party dangte thil tha tih infak sak hi an hreh ta lem lo; a bikin tun sawrkar tharah hian, sawrkar hmasate thil lo tih that fakna thawm hriat tur a tam ta deuh em aw a tih theih awm e.
A hun leh a hmun azira infak leh insawisel hi kan ram hruaitute hian hreh lo se a duhawm hle a ni. Mimal leh party hamthatna tur ni lo, ram leh hnam tana pawimawh leh tha turah chuan, ruling an ni emaw, opposition an ni emaw, a tul chuan infak mawlh mawlh thei sela, a tul chuan hmai sen inhmuh khawp pawhin insawisel ngam bawk sela, ram leh hnam hmangaih intia pen chhuak an ni ta sa sa. Politician-te hian “Mizoram First” tih hi thupui bera an neih phawt chuan, ramin hma a sawn ngei ngei ang tih a rinawm. Tuna hma kan sawn chak theih lohna chhan pawh hi, kan politician-te hian “Mizoram First” tih hi thupui bera an neih tawk loh vang a nih a rinawm ber.
Mizoramin asset a neih that berte zinga pakhat medical college a lo pian chhuah danah pawh hian, a hlawhtlinna tur kalkawng a bumboh hle tih kan hre tlang vek awm e. A bul tantu an awm a, a hnu lama chhunzawmtu an awm a, a hlawhtlin hnua enkawl zuitu an awm bawk a. Medical college chungchangah te, cancer enkawlna tihchangtlunnaah te, leh thil dangah te pawh, tuna sawrkar hian sawrkar hmasate hmalakna an fak thiam hle niin a lang a, a lawmawm hle. Sawrkar hmasate thiltih that an fak hian, mipui/voter an hloh phah lova, a nihna takah chuan mipuiin an ngainat phah zawkin a rinawm.
Infak hun a awm a, insawisel hun pawh a awm bawk. A hun leh a hmun hriat hi a pawimawh lai tak chu a ni awm e. Kan politician-te tawngkam leh thiltih hi mipuiin kan thlir ber a nih avang hian, thu sawi liam mai mai lo tur leh, fimkhur lo taka thil ti liam puat puat lo turin, an intuai thar ve zel hi a pawimawh hle a ni.