Tuntuma United hi chu a ropui thinna leh goal khung hnem ber a nihna Manchester United kha ni loin coach a nihna Major League Soccer club DC United zawk a ni a, a team en-kawl chu play-off a thlenpui zawh loh avangin club nen hian inbiakremnain an inthen.
August 2002-a rawlthar kum 16 mi lek ni chunga Everton thuam inbel chunga professional debut nghakchhuak England forward hlui hian inkhelh a bansan hnuah coaching lam luhchilhin, July 2022 khan Washington khaw club United-ah hian manager puitling hna a chelh tan a, chumi hma thla 18 chhung chu he team-ah hian player niin a lo khawsa tawh a, chumi hma January 2020 khan Derby lamah player-coach hna a lo chelh tawh bawk.
Kum 37 mi chuan play-offs khel tura a theihna zawng zawng a hman thu leh an tum an tihhlawhtlin zawh tak loh avangin tun hi chhuah hun diktak nia an ngaih thu a sawichhuak.
DC United hian Inrinni khan season kal laia an match hnuhnungberah sihnih faiin New York City FC hneh bawk mah se a zawnin season li chhung zet chu play-offs an khel pha lo ta tho a, an boss-in a tuar ta a ni.
DC United chief executive leh co-chairman ni bawk Jason Levien pawhin thenna biahthu inhlan chungchangah Rooney an biak thu leh a tu lam lam tan pawha tha zawk tura ngaiin kawng dang ve ve zawh an titlu ta tih a sawi ve bawk.
Inhriatthiamtawnnain Rooney leh United in\hen
