Inkahhai kan dil lo, kan tang zel dawn – Iranian foreign minister

Inkahhai kan dil lo, kan tang zel dawn – Iranian foreign minister
Middle East-a buaina chhuak chuan zawih lam a panin a lang lo va, Pathianni khan Israel chuan Iran chhim lamah beihpui thlak thar a tum thu a puang a, hetih lai hian Iranian foreign minister chuan President Donald Trump-a sawi angin inkahhai tihtawp an dil lo tih a sawi bawk.
Trump-a hian Inrinni khan NBC News hnenah Iran chu ‘inremna siam turin a inpeih tawh a, an duh dan (term) a la that tawk loh avangin ka duh lo’ tiin a sawi.
Hei hi Pathianni khan Iran Foreign Minister Abbas Araghchi-a chuan chhangin ‘inkahhai a dil lo’ tih a sawi.
“Inkahhai hi kan dil ngai lo va, inbiakna neih kan duh thu pawh kan sawi lo. A tul chhung chu mahni inveng turin kan inpeih reng a ni,” tiin Araghchi chuan CBS News-a ‘Face the Nation’ a hrilh a. “Hei hi tun thlenga kan tih tawh chu a ni a, President Trump-a’n hnehna a chan lohna tur indona a kalpui chhunga kan tih zel tur pawh a ni,” a ti.
Pathianni khan US Defense Department chuan Ningania Iraq khawthlang lama KC-135 refueling plane tlaa thi American service member paruk hming a puang a. Anni nen hian indonaa US sipai thi hi 13 an ni ta a, pasarih chu an hmelmate kah hlum an ni a, pariatin hliam an tuar tawh bawk niin Pentagon chuan a sawi.
Israel Defence Forces chuan Pathianni khan an official X account-ah, “IDF-in Iran khawthlang lama Iran firfiak sorkar hmunhmaah nasa taka beihpui thlak tan a ni,” an ti.
IDF hian Inrinni pawh khan Lebanon-a Hezbollah-te a kap tih a sawi bawk a, “Air Force chuan Al-Qataraani-ah firfiak pawl, Hezbollah ralthuam kahna hmun eng emaw zat an kap a, he hmun atang hian firfiakte hian hun bituk chhungin ralthuam kah an tum a ni,” a ti.
“Beirut-a firfiak pawl, Hezbollah-a ‘Radwan Force’ unit headquarters beih a ni a, tihchhiat a ni,” an ti bawk.
Lebanonese health ministry chuan Pathianni khan indona a chhuah atangin mi 850 an thi tawh tih a sawi a, mi 2,000 chuangin hliam an tuar tawh bawk.
Indona a kal mek lai hian Pathianni khan Pope Leo XIV chuan, “Middle East-a Kristiante hmingin leh hmeichhia leh mipa duhsakna nei zawng zawng hmingin mei hi titawp rawh u! Inbiakna kawngte chu hawn leh rawh se!” a ti.
Vatican-in a tar lan danin, “Tharum thawhna hian mipuiten an nghah mek dikna, muanna leh remna a thlen thei ngai lo,” a ti.
Lebanon tana hamthatna thlen thei tur inbiakna a awm a beisei thu a sawi bawk a, “Buaina khirh tak awm mek chin felna tluantling a awma Lebanon mipui zawng zawngte thatna tur a thlen theih ka beisei,” a ti.
Ukrainian President Volodymyr Zelenskyy-a chuan Trump-a’n Ukraine tanpuina a mamawh loh thu a sawi laiin Iran-in a siam Shahed attack drone-te do let dan turah thiamna zawngin vawi eng emaw zat US sipaiten an pan tawh niin a sawi.
Zelenskyy-a hian Inrinni khan Kyiv-a chanchinbu hrang hrangte nena an inkawmnaah he thu hi a sawi a ni.
“American-te hian vawi tam tak min rawn pan tawh,” a ti. Middle East ram eng emaw zat hruaitute pawhin drone chungchangah an biak tawh tih a sawi bawk.
Iran-in a duan Shahed-te hi jet te tak te ang deuh an ni a, puak thei thil an keng a. Iranian sipaite hian Gulf ram chhungah mi an bei a, US sipai hmun leh consulate-te pawh a tel a, hei hi US leh Israel-in Iran an beih avanga phuba lakna a ni a. Gulf ramte chuan air defense missile man to tak tak hmangin Shahed hi an kap thin a, an hmanraw hman leh an lo do letna man a into hleih hle.
Kum 2022-a Russia-in Ukraine a beih atang khan Iran-in a duan drone hmangin Ukraine khawpuite a bei thin a. Kyiv hian kawng hrang hrang hmangin tihchhiat dan a zir a, hei tun indo meknaa ram dangte pawhin thiam an mamawh ve chu a ni.
Hetihlai hian President Trump-a chuan NBC News hnenah Iran supreme leader thar, Mojtaba Khamenei chu a la dam em tih a chiang lo tih a sawi a, ‘tunah hian tumahin an la pho chhuak thei lo’ tih a sawi.
Trump-a hian US tanrualpui ram eng emaw zatin eibar atana tuikawng pawimawh tak, Strait of Hormuz him nana tanpui a dilna chu an chhang hlawm tih a sawi a; mahse, tute mah an hming a lam lo va, tute mahin puih an inhuam thu an sawi hriat a la ni lo bawk.