Kumin July 7-a Kangvai, Churachanpur district Manipur-a Zohnahthlak leh Meitei-te inkahnaa hliam tuar Nehtinsat Haokip (21) s/o Kanmang Haokip, New Zalenphai ami chu July 17 khan Central YMA ruahmanna in a hliam enkawl zui turin NEIGRIHMS Shillong thlenpui a ni a. Shillong Group YMA-in an lo buaipui dawn a ni.
Thudawn danin, July 7-a Kangvaia inkahnaah Kangvai atanga km.1 leka hlaa awm, Zalenphai khaw mipa ho chu Kangvaia Zohnahthlakte pui turin an kal a. Hetah hian Nehtinsat Haokip pawh hi silai leh hmanrua engmah keng loa kal ve in, inkahna hmun an thlen hian silaimu leng karah leiah bawkkhupa a awm laiin, silai mu hi a dâr vei lamah lutin hliam a tuar a. Lamka Hospital-ah enkawl niin x-ray a a lan dan chuan a taksa hmun thum – a dâr veilam, a awm bawr leh a chuap veilam sirah silaimu a tang a, engemaw chen enkawl a, refer theih a nih ve leh Indigenous Tribals Leader Forum hruaituten CYMA hnenah lehkha thawnin July 13 khan Aizawl phurh thlen a ni.
Aizawl thlenpui a nih ve leh Central YMA hruaituten lo dawngsawngin Civil Hospital-ah enkawl a ni a. Doctor-ten hmunpui lam panpui thuai tura thu an rawn angin NEIGRIHMS panpui a ni.
Central YMA chuan vanduaina tawk Nehtinsat Haokip leh a patea, Nehlen Haokip te chu thlawhna ticket laksakin sumfai Rs. 30000 an pai a, a tul anga inenkawlna senso pawh la ngaihtuahsak nise an ti.
Shillong Group YMA president Ricky Zobiakvela chuan Nehtinsat Haokip leh amah kalpuitute chu Umroi Airport-ah YMA ambulance nena lo hmuakin hospital hi pan tlangpui nghal a ni a, theihtawpa an lo buaipui tur thu an sawi a ni.
Inkahnaa hliam tuar Shillong-ah enkawl dawn
