Inkhawm tihtlem lamah tlu lo

Presbyterian Kohhran rorelna sang Synod Executive Committee-in inkhawm tihtlem chungchang an ngaihtuah a, kal dan ngaia kal an rel.
Executive Committee hian kal dan ngaia kal an rel na a, thu tawp siamtu tur an nih loh avangin, an thutlukna hi Synod Inkhawmpui, kum tawpa neih turah an thlen ang.
Thu dawn danin, Synod Executive Committee (SEC) hian Presbytery hrang hrang atanga thu lut, inkhawm tihtlem chungchang an rel dan an thlir a, hetah hian kal dan ngaia kal rih ni se tia rel an thahnem zawk. Questionnaire hmanga mipui ngaihdan lak an thlir bawk a, hetah pawh hian kal dan ngaia kal duh an thahnem zawk.
Synod hnuaia research & evaluation wing-in questionnaire hmangin mipui ngaihdan hi an la a ni.
Inkhawm tihtlem chungchang hi Presbytery lam atanga a luh avangin kum hmasa lamah Synod Inkhawmpuiah ngaihtuah a lo ni tawh a, an sawiho hnuah SEC kutah dah a ni. SEC chuan Presbytery tinah sawiho ni se tiin an rel a, chumi bawhzui chuan kuminah, October ni 5-8 chhunga neih Presbytery hrang hrangin an sawiho a ni. Chung atanga thu lut chu SEC hian a thlir leh a ni.
SEC hi kar hmasa Ningani khan an thu tan a, Thawhtanni thleng an thu ang.