Mizoram Synod chuan kohhran inkhawm titlem zawnga kal a tum rih loa, chhungkaw kehchhia kan pun zel loh nana hma lak rawtna chu bawhzui nise a ti thung.
Mission Veng Presbyterian Kohhran biak ina Synod Inkhawmpui vawi 100-na neih mekah a ni thumna atan Zirtawpni khan rorel a ni a. ‘Inkhawm tihtlem chungchanga zirchianna leh Presbytery ngaihdan khaikhawmna’ ngaihthlak niin, zirchiangtute rawtna siam leh Presbytery ngaihdan angin kal dan ngaia kal chu kan tih tur a ni, an ti. ‘Chhungkaw kehchhia kan pun zel loh nan hma lak’ rawtna lut chu tha tih a ni a, SEC-in hma lo la se tih a ni.
‘Lehkhabu tha chhiara hma kan sawn theih nan hma lak’ rawtna chu SEC-in a tul angin bawhzui se, an ti a. ‘Anpui inkawp (same sex marriage) a bo theih nana hma lak’ rawtna chu Synod hmalak mekna a ni a, kohhran tinah hma lak chhunzawm zel nise, an ti.
‘Chhungkaw harsate khaichhuak zawnga tun aia nasaa hma lak’ rawtna chu SEC-in chak zawkin hma lo la se, an ti a. ‘Contract hna hralh chungchang’ lut chu kohhran duh loh zawng a ni a, SEC-in hma lo la se, tih a ni.
‘Zirlaite hnena scholarship, stipend leh pocket money pek dan enthat’ rawtna chu hman nghal turin SEC-in lo entha se, an ti a. ‘Fa lâk (adoption) chungchanga zirtirna siam’ rawtna chu tha tiin, SEC bawhzui tura tih a ni.
‘Inkhawmpui rorel tawh leh kohhran practice mek tihdanglam thu ah fimkhur taka kal’ rawtna chu fimkhur taka kal zel nise, tih a ni a. ‘Mizo Kristian Lengkhawm Hlate audio-a dahthatna siam’ rawt chu tha tiin, SEC bawhzui tura dah a ni.
‘Synod-in Vocational Training /Education a buatsaih mek sawrkar pawmpui a nih theih nan hma lak’ rawtna chu hmalak mekna a ni tih inhrilhfiah a ni.
Inkhawm tihtlem tum rih lo Chhungkaw kehchhia pun zel loh nan hma lak rawt
