MNF leh India sawrkarin inremna thuthlung an ziah hnua thu dah vangin, Manipur-a MNF sipai thubuai neite chu court-in a fihlim tir a, inremna ziah hnu ah kum 38 a liam hman a, thubuai an neih atangin kum 40 a liam hman.
SBI Churachandur Branch chu kum 1984 khan rawk a ni a. He thilah hian Mizo National Army zinga mi pathum chu Manipur Police-in inhnamhnawihah puhin an man. Thubuai rip tak tak siamsak an ni a, an thubuai awrh zingah hian thiam loh an chang a nih chuan tih hlum theihna hial a tel.
A hunlai hian an chungthu rel nghal ni lo mah se, kum 2005 khan Manipur Court-a chief judicial magistrate thupekin man tura tih an ni a. Pte.Vanlalhruaia, Thingkangphai Churachanpur district chu court-ah hian a inlan thin avangin man tura tih zingah a tel loa, midang pahnih – Sgt. Lalzarliana Thenzawl leh Pte. Biakhluna, Kolasib chu man tura tih niin, Lalzarliana hi a zinbo lai a nih avangin man tur a awm lo. Biakhluna hi man niin Kolasib District Jail-a dah a ni a, damlohna thilah bail theihin certificate a nei a, court hian a pawmsak.
Hetianga an case tih nun thar leh a nih hian Mizoram sawrkar pawhin case tihtawp a nih theih nan theih ang angin a bawhzui pui a, Law department hotute chu Manipur-ah kalin he case hi an han zirchiang a, court-a chinfel ngai a nih tawh avangin an aiawha ding tur ukil ngaihtuahpui thlengin an buaipui a ni.
Case ngaihtuah chhung hian ukil pawh tum thum vel an inthlak hman a, pakhat phei chu an thubuai a inchiah lai mek hian a thi nghe nghe. A buaipuitu ber Ex-MNA Association pawhin president pali an hrawn hman a. Ukil rawihna bakah an kal velna senso hi thawhkhawm thin tih Ex-MNA Association president C Zama chuan a sawi. An sum hman zat erawh an hre thei mai tawh lo tih a sawi.
Rei ngial court-ah hian he thubuai hi a inchiah a, an chungthu reltute hi Meitei vek an nih avangin a chinfel kawngah pawh an muan phah nia an ngaih thu, an ukil pakhat, Meitei vek chuan a hrilh niin Ex-MNA hruaitute hian an sawi a ni.
Thubuai ngaihtuah chhung hian India President, Prime minister, Mizoram larsap, chief minister, Supreme Court leh Gauhati High Court hotute bakah India rama politician hrang hrang hruaitu mi 30 vel hnenah hma laksak tur hian an ngen kual hman tih an sawi.
Hetiang a nih lai hian, tuna court-in an case a tihtawp chhan ni taa lang chu, MNF leh India sawrkar inrem lai khan, sawrkar laipui hian MNF mi leh sa, pawikhawihna thubuai hrang hrang nei chu, an case kal mek emaw case siam thar sak emaw awm lo turin ziakin an lo dah a, chu chu tuna case tihtawp a nih na ber nia ngaih a ni tih an sawi.
Inremna avanga thu dah hmangin case neite kum 38 hnu ah fihlim
