Inren nan PM-in a zahvea SPG convoy titlem turin ti

Inren nan PM-in a zahvea SPG convoy titlem turin ti
Prime Minister Narendra Modi-a chuan Special Protection Group (SPG) chu a convoy chu a zahve (50%)-a titlem turin a ti a, hei hi Middle East-a buaina chhuak chhunzawm zel vanga khawvel pum huapa energy man sang zel sutkian nana sorkarin tuialhthei rencham a tumna pakhat a ni.
Hemi chungchang hretu thuneitute chuan prime minister hian hian PMO chu a thuihhruaite chu electric hmang lirthei tam zawk a awm theih nana hma la turin a ti bawk tih an sawi.
“Ni hnih kalta chhung khan venhimna tichhe chuang lovin convoy lian tak kha tihtlem a ni tawh,” tiin a hretu pakhat chuan a sawi.
Prime minister-in a biak hnuah Union Home Minister Amit Shah-a pawhin a convoy chu a titlem tih thuneituten an sawi a. Nilainia a chenna in a chhuahsan pawhin security lirthei 4-5 chauh a awm tih hmuh a ni a. Home minister convoy-ah hian hmun azirin lirthei 10-30 vel a awm tlangpui thin a. Delhi-ah chuan 10 vel a ni thin.
Modi hian Pathianni khan mipuite chu tuialhthei renchem turin a lo ngen tawh a, heng zingah hian car pooling, vantlang inkalpawhna hman, in atanga hnathawh, rangkachak lei tlem leh ram pawn lama zin tihtlem leh thil dangte pawh a tel a. SPG hi India leh ram pawna prime minister vengtu, elite security unit a ni.
Prime minister convoy-ah hian ambulance leh a security officer-te an tel a, PMO atanga team-te pawh an tel a, eng hmunah pawh darkar khat aia rei a awm apiangin make-shift PMO an siam thin a. Convoy-ah hian lirthei 24 hnih an awm tlangpui a, a aia tam pawh a nih chang a awm.
May 10-a Hyderabad-a BJP rally-a thu a sawinaah Modi-a hian mipuite chu petrol leh diesel hman tlem a, metro service leh carpool hmang tur te, electric lirtheia insawn tur te, in atanga hna thawk tur te, ram pawna zin hun sawn tur te, kum khat thleng rangkachak lei loh tur te a lo ngen tawh a ni.
‘Modi 7 Appeals’ tia an sawi chuanna thlalak chu sorkar leh social media hmangin thehdarh a ni a. Asia khawthlanga US leh Iran inkara buaina chhuak mek karah inrenchemna hi ram hmangaihnaa tih tur anga sawiin tuialhthei thlitfim loh man sang zel leh khawvel puma mamawh inbiakna buai mek avangin Indian foreign exchange reserve-ah harsatna awm thei a ni tih a sawi a ni.
“A theih ang angin foreign reserve hi kan ren a ngai,” tiin mipuite a hrilh a, rangkachak leh petroleum thil siamte chu ram dang atanga lak luh a nih chuan dollar-a pek a nih thu a sawi.
A thu sawi atanga rei lo te chhungin social media-ah Modi-a’n Gujarat-a Jamnagar-a roadshow a nei lai video a darh nasa hle a, hetah hian armored SUV-ah lirthei tam takin an hual vel a. Mi tam takin a convoy-a lirthei tam tak awm thlalak an tidarh nasa hle.
Sorkar laipui leh state-a hruaitu leh minister dang tam tak pawhin prime minister-in a convoy tihtlem tura a tihna chu an zawm a rinawm.
Uttar Pradesh Chief Minister Yogi Adityanath-a pawhin a convoy-a lirthei awm zat tihtlem turin thupek a lo chhuah tawh a, a minister leh sorkar hotu liante pawhin an titlem a. Chief minister hian mipuite pawh vantlang lirthei hmang turin a ngen bawk.