Congress hruaitu, Rahul Gandhi-a kaihhruaia eptuten Bihar-a thawm an neih len hle laiin rorel lai tangrual, National Democratic Alliance (NDA) pawhin Inrinni atang hian an pawl tichaka state chhunga an mite tihphur nan a huhovin beihpu an thlak ve dawn.
Bihar hi October-November vela inthlang tur niin NDA hian committee 14 dinin he state-a tangho zinga lian zual pahnih, BJP leh JD(U) chuan pasarihah hotu ber nihna an chelh.
State chhung hmun hrang hrangah worker intawhkhawm an huaihawt dawn a, tanghova hruaituten thawh hnihin, August 23 atang 25 leh August 28 atanga 30 chhungin hun an hmanpui dawn a ni.
Committee an dinah hian NDA-a tel ve party dang pathum — Lok Janshakti Party (Ram Vilas), Hindustani Awam Morcha (Secular) leh Rashtriya Lok Morcha mite pawh an tel a ni.
BJP hruaitu zinga committee hruiatu zingah hian deputy chief minister pahnih, Samrat Chaudhary leh Vijay Kumar Sinha bakah an state president Dilip Kumar Jaiswal, union minister atangin Giriraj Singh leh Nityanand Rai, state minister Mangal Pandey leh Lok Sabha MP Sanjay Jaiswal te an ni.
JD(U) hruaitu zinga committees hotute hi an party national working president Sanjay Jha, union minister Ram Nath Thakur, state president Umesh Singh Kushwaha leh state minister atangin Vijay Chaudhary, Shrawon Kumar, Ashok Choudhary leh Ratnesh Sada te an ni.
Committee 14-te hian member pasarih theuh an nei a, hetah hian MP leh state minister te an tel a. Tangho hian bial hrang hrangah RJD-Congress-Left tangrualin beihpui an thlak mek do let turin inkhawm lian an buatsaih hlawm dawn a ni.
Worker intawhkhawm hi hmun 83-ah huaihawt tura ruahman niin Bihar pum tuam chhuah tum a ni a. Assembly bial 283 awmah ni ruk chhung hun an hmang dawn a ni.
Rorel lai tangrualte hian Gandhi-a’n tun hnaia election commission-in electoral roll Special Intensive Revision (SIR) duh lohna leh dik lohna puanga state pum fang chhuak tura beihpui a thlak mek laiin tan an la ve a. Congress hruaitu hun hmannaah hian an party MP leh Bihar-a an thawhpuite thawk chhuakin ECI chu BJP nena tangruala ‘vote ru’ niin an puh mek.
NDA hruaitute hian hun an hman turah hian mipuite hnenah rinna tuha eptuten SIR neih dik lohna an aupuite chu chhanga sawi fiah an tum dawn a. Mipuiin vote thlak theihna dikna chanvo an neih chu electoral roll final list a chhuah hma chu tumah vote paihsak an nih lohzia an hrilh dawn a ni.
Inrinni atangin NDA-in Bihar-ah beihpui thlak ve dawn
