Tun hnaia defence institute of advanced technology huaihawt event pakhat hmanpuitu defence minister Rajnath Singh chuan, kum 2047-ah India chu developed ram a ni hman tawh ang a, kum 2027-ah world economy-ah pathumna a hauh hman bawk ang, tiin a sawi a. Tun dinhmunah India hi world economy san dan indawt danah pangana a ni mek a, a aia sang ramte hi a san dan indawtin USA, China, Japan leh Germany te an ni.
Khawvela ram lian ber pasarihna India hi mihring tamna ber a ni ta a, changkanna tehnaah erawh hmasawn tawh ram (developed country) dinhmun a la thleng pha lo va, ‘ram hmasawn mek’ (developing country) zingah a la awm a. Developed country ni ve tur chuan kum 24 zet kan la hmabak tihna a ni ber awm e.
India ram hmasawnna tur vei em emtu scientist Dr. APJ Abdul Kalam, India President 11-na khan, President a nih hma daih 1998 atang tawh khan India ram hi kum 2020-ah chuan ‘developed country’-ah a inhlangkai hman ang tiin, chu dinhmun thleng tura hmalakna tur ruahmanna tam tak duangin chumi behchhan chuan lehkhabu thahnem tak a ziak a, chung zinga a hmasa leh lar em em chu “India 2020” tih kha a ni. Vanduaithlak takin 2015-ah a boral ta hlauh a, 2020 hmelhmang a hmu ve hman ta lo a ni.
Mahse, Dr. APJ Kalam-a ruahmanna hrang hrang hnuaia India-in scheme ropui tam tak a kalpui mup mup hnuaiah India chuan hma a sawn nasa hle tih a lang. Pu Kalama khan “India 2020” kha lo tuipui lo ta se, lo insawi ba lo ta se, tun dinhmun hi India hian a thleng pha ang em? tih hi zawhna pawimawh tak a ni.
Hetiang deuh hian, Mizoram hruaitute leh mithiamte pawh hian kan ram hmasawnna atan insawi batna tur ruahmanna neiin ram hi kaihruai thin ta se, hma kan sawt chak deuhin a rinawm; manifesto inziahthatsiak mai mai lo deuhvin.
Insawi batna tur…
