Inthlan bawrah Myanmar
sipaiten civil mi 700 vel that
Nikuma an ram inthlanpui neih hun chhung, thla ruk chhunga civil mi 700 chuang thihnaah Myanmar sipaiten mawh an phur niin UN chuan a sawi.
August atanga January thlenga thu lakna rintlak behchhana report thar chuan mi 702 vel an thi tih an finfiah a, heng zingah hian hmeichhia 224 leh naupang 153 an tel.
Kum nga kal taa sorkar paih thlatu sipaiten inthlan an puan atanga thla ruk chhung a huam a, inthlanah hian eptu party lian ber berte chuh ve phalsak an nih loh avangin inthlan lem tak niin mi tam takin an sawi.
Report chuan ‘ram dangte puihna tlahniamin mi maktaduai tam takte hrehawm tawrhna a tizual’ tih tar lan a ni.
Myanmar sipaite hian kum 2021 khan sorkar paih thlain tual chhung indona a chhuak a, mi sang tam tak an thi a, mi maktaduai tel hmun dangah an tlanchhe bawk.
Ram chhung hmun zau tak chu ralthuam keng sipai eptu pawlte thununna hnuaiah a la awm phah mek.
UN Human Rights Office atanga report-ah chuan thlawhna hmanga beihna chu ‘thil tihchhiatna leh hrehawm tawrhna thlentu lian ber pakhat a la ni reng’ tih a tar lang.
Sagaing bial chu ‘sipaiten chakna an neih tumna kawnga civil mite tana hlauhawm ber’ a ni a, mi 191 an thi a, hmeichhia 60 leh naupang 30 an tel niin tar lan a ni.
October thlaa pawikhawihna thlengah Chaung-U, Sagaing-a sikula civil mi pungkhawmte chu kah an nih avangin mi 23 an thi a, naupang pali an tel.
December thla khan sipai thlawhnain Tabayin, Sagaing-a thingpui dawr pakhat chu football inkhel tur en tura mipui an pungkhawm laiin a bomb a, mi 19 an thi a, mi 20 chuan hliam an tuar nia tar lan a ni.
Report-ah hian Arakan Army-in an pawla an tan luihtir Rohingya mite tihduhdah an nih bakah mi thah, man leh mipat hmeichhiatna lama tharum thawhna thlengte a tar lang bawk.
Sipaite hian kum nga kalta khan mipui thlan roreltu sorkar atangin thuneihna an la a, an hruaitu, Aung San Suu Kyi chu lung inah an tantir.
Kum hnih chuang kalta khan sipai dodaltu helho chuan hma an sawn hle a; mahse, tun hnaiah sipai an chak thar veleh deuh.
April thla khan sorkar paih thlatu, General Min Aung Hlaing chu president a ni ta a. Inthlan hi tihfel lawk a ni a, mipui party tam tak chuh ve khap a ni a, tual chhung indona avangin ram chhung hmun zau tak tak pawh an tel lo.
Parliament chu sipai lamtangte thunun a ni a. Sipaite hian seat hmun lia thena hmun khat an hauh sa a, sipai party tho, USDP chuan seat la awm zinga 80% vel an la a ni.
Inthlan bawrah Myanmar sipaiten civil mi 700 vel that
