Inthlan kaihhnawih campaign leh hmalakna reng rengah naupang kum tling lo hman khap tlat a ni tih Election Commission of India chuan a sawi a. Hetiang zawnga hmalakna a awma man chhuah a nih chuan an chungah ngaihhnathiamna a awm dawn lo tih a sawi.
Political party, candidate leh inthlan kaihhnawiha thawktu zawng zawngte chu engti kawng pawha political campaign leh rally-a naupang hmang lo tura hriattirna hi ECI hian a tichhuak a. India rama inthlan campaign thianghlim leh felfai tak neih a nih theih nan leh, pianphunga rualbanlote zahawmna vawnghim chunga hma lak a nih theih nan thupek a lo siam tawhte bawhzuiin, inthlan kaihhnawih thil eng pawha naupang hman chungchangah thupek hi a siam a ni.
Political party-te chu inthlan campaign-ah naupangte chu engti kawng zawng maha hmang lo turin a hriattir a; poster/ pamphlet sem emaw slogan auchhuah emaw campaign rally, election meeting leh a dangtea tel tir lo turin a hriattir a. Inthlan kaihhnawiah engti hawi zawng maha naupang hman a rem loh thu leh hmang lui an awma man chhuah an nih chuan an chungah ngaihhnathiamna lantir a ni dawn lo tih party leh candidate-te a hriattir a ni.
He khapna hian political campaign ang chi reng reng siam nana hman thlengin a huam a. Poem, hla, hla thu chham, party/ candidate chhinchhiahna lantir, party ngaihdan leh hlawhtlinna pholan emaw, khingpui party/ candidate sawiselna lam hawi tarlannaah ECI hian naupang teltir a khap a ni.
Chutihrualin, naupang chu a nu leh pa emaw amah enkawltuten emaw an hruai chuan, political leader bulhnaiah pawh awm mah se, political party-in inthlan campaign-a engmah a tih tir loh chuan inkaihhruaina bawhchhiatna anga ngaih a ni lo thung.
Naupang chhawr luih chungchanga thil tih leh dan kaihhnawihte tha taka zawm a nih theih nan district election officer leh returning officer-te chuan mawhphurhna an nei tih ECI hian a sawi a ni.
Inthlan campaign-naah ECI-in naupang kumtling lo hman khap
