Inthlan hma leh inthlan a hnu leh
sawrkar hnua thusawi inkalh a tam
Chief minister Lalduhoma chu MLA inthlanpui leh inthlanpui hnua a thusawi chauh ni loin, an sawrkar hnua a thusawi hoah pawh inkalh a tam a, thudik ziktluak lo sawi a ching bawk tih MNF hruaitu Dr R Lalthangliana chuan a sawi.
Nilainia AMC inthlanpui atana MNF party hruaitute nen an inkawmkualnaah MNF senior vice president Dr R Lalthangliana chuan, ZPM sawrkar hnu ah ram rorelna sang berah thu belhchian dawl lo, thu tak ni lo a tam ta lutuk tih a sawi a. Chief minister berin thudik ziktluak lo sawi a addict tlat nia sawiin, “A thusawi reng rengah sawrkar hmasate tai ran lo chuan thu a sawi thiam tlat lo a. A thusawi hrang hrang hi chik taka ngaihthlak chuan, inthlan hmaa a sawi leh an sawrkar hnua thusawi, an sawrkar hnuah ama thusawi ngei ngei pawh inkalh tak tak a tam hle a, hei hian amahah thu tak a awm loh zia a tilang chiang hle a, mipui pawhin hei hi an hrechiang tan zel a ni,” a ti.
MLA inthlan hnuhnung berah Congress leh MNF thlak duh hrim hrim thu tlangaupui chu ZPM hna pui ber a nih avangin mipuiin ZPM MLA candidate-te mimal en loin, ZPM candidate hrim hrim an thlang tling a, hei hi an hotute insawi dan pawh a ni tih MNF hruaitu hian a sawi a. Mipuiin an hre chiang chho zel a, an sawrkar hnua inthlan awm a piangah an hnawl mek zel a, MNF chu Pathian leh mipui zarah a tho chhuak leh thuai dawn, tiin a sawi bawk.
MNF chu AMC dintu, Aizawl khawpui hmasawnna atana nasa taka hna lo thawk tawhtu leh hmathlir nei tha ber, an hmachhawp chhunzawm tur MNF official candidate-te vote turin mipui a ngen tih a sawi a ni.
Inthlan hma leh inthlan a hnu leh sawrkar hnua thusawi inkalh a tam
