Inthlan tih hma chhanah
chhuanlam tling awm lo
– Mayor
Mizoram sawrkarin local council leh village council inthlan a sawn hma chhana a chhuanlamah thu tling a awm lo tih Aizawl mayor Lalrinenga Sailo chuan a sawi.
Thawhtannia MNF office-a inkhawmah mayor chuan LC leh VC te sawrkar thawhpui thei lo an awm loa, ZPM sawrkarin party dang LC leh VC-te a thawhpui thei lo zawk tih a sawi.
Local council phei chu Municipal hnuai an ni, tiin, “Aizawl Municipal Corporation huamchhungah hmasawnna hna hmachhawp kan ngah a. Central atanga kum 2023- 2024 fund lokal tur cheng vaibelchhe 15 chuang ala awm a, 2024-2025 chhungin development fund vaibelchhe 29 chuang lokal tur a la awm. Keimahni thawhchhuah ve sum vbch.13 vel a la awm bawk. Hmasawnna hna thawh tur LC-ten an la neih teuh laia an term nasa taka pawhtawi sak hi a dik loa, anmahni thlangtlingtu mipui zah lohna a ni,” a ti.
ZPM a sawrkar atanga kum khat pawh tling loah Sinlung Hills Council an inthlang a. MNF-in sawrkarna a la a, tun LC leh VC inthlanah pawh beiseina sang tak MNF chuan a nei tih MNF adviser ni bawk Lalrinenga Sailo hian a sawi. Congress sawrkar vanglaiin AMC-ah MNF an sawrkar thei a, mipuiin party an en vak lo nia a lan thu a sawi bawk. “Tun tum LC leh VC thlanah pawh MNF-in hnehna sang tak kan chan ngei ka beisei,” a ti.
ZPM sawrkar tirhin mipuiin beiseina kan nei sang a. Ram changkangte tih danin ni 100 chhunga an tih tur an puang a. Mipui pawh kan phur hle a, mah se, an hlawhtlinna percent a sang lo hle niin a sawi. Aikal lak, posting, sum remchem leh kawng dang tam takah an sawi loh ang hlirin an awm tih a sawi a ni.
Inthlan tih hma chhanah chhuanlam tling awm lo – Mayor
