Inthlana duty turten vote thlak

Local council/ village council inthlana duty turten vote an thlak mek zel a. Ningani khan Serchhip, Hnahthial leh Saitualah pawh vote thlak a ni.
Serchhipah hian bawrhsap pisa hmun hnihah vote thlakna – Facilitation Centre siam a ni a. Serchhip district chhunga vote neiten Ningani atanga thlak tanin Inrinni thleng hun hawnsak an ni. Hlawm hnihna, district pawna vote neite tan erawh Ningani chauh kha hawn a ni a. Rokhawlhna avanga thlak hmanlo an awm chuan vawiin, February 7 chhun dar 12 thleng hun hawnsak an ni.
Hnahthialah hian Facilitation Centre pakhat siam a ni a. District election officer, bawrhsap Rita Lalnunmawii Pachuau chuan vote a thlak hmasa ber a ni. District chhunga vote nei) leh district pawna vote neiten an thlak nghal ve ve a, tlai dar 4 thleng hun hawn a ni. February 7 & 8 hian district chhunga vote nei tan bik vote thlak theih hun hawn zui a ni ang.
Saitualah pawh district election officer, bawrhsap Dr Lalngura Tlau chuan vote a thlak hmasa ber a. District chhunga leh pawna vote neiten an thlak ve ve, district chhunga vote nei tan hian Ngopa leh Phullen-ah Facilitation Centre siam a ni bawk a. February 8 thlengin district chhunga vote hian an thlak thei ang.