I&PR director K Vanlalsangi chuan Thawhtanni khan District Information & Public Relations office Lawngtlai a tlawh a. DIPRO Lawngtlai Zonunchama Ralte leh thawktu dang bakah MJA Lawngtlai District-in lo dawngsawngin an inkawm.
DIPRO Lawngtlai leh MJA Lawngtlai inkara thawhdunna tha tak awm thin chu hmalam hunah pawh chhawmnung zel turin I&PR director hian a sawm a. Sawrkar thuchhuak dik taka thehdarh bakah department- te hmalakna puanzar kawngah DIPRO office chuan mawhphurhna an nei lian hle tih sawiin, sawrkar rin tlaka thawk thin turin a chah.
MJA Lawngtlai chuan I&PR director-in a tlawh chu lawmawm an tih thu hrilhin, rah tha a chhuah ngei an beisei tih an sawi a. MJA leh I&PR chu kawng engkima thawkho tlat an ni a, sawrkar thuchhuak, hmalakna leh mipui hriat tur pawimawh thehdarh kawngah theihtawp an chhuah tlang thin tih an sawi.
IPR hotu hian DIPRO office Lawngtlai hmunhma leh building a enfiah a. Hemi hnu hian DIPRO office Siaha tlawhin Siaha a pan lehnghal.
DIPRO Siaha K Ngosai leh a thawhpuite bakah MJA Siaha District-in lo dawngsawngin an inkawm a. Director chuan tha taka an thawhho thinnaah lawmthu a sawi a, hun lo kalzel turah pawh thudik leh rintlak thehdarh kawngah theihtawp chhuah tlang turin a fuih.
MJA Siaha District president CZ Hluna pawhin IPR director chu lawmthu an hrilh a, an department nen thawhdunna tha tak an nei a, hmalam hunah pawh thahnemngai taka an thawhdun zel tur thu a sawi a ni.
Director hian DIPRO Siaha office hmunhma leh ram a tlawh a, fur ruahtui tlakhmaa hmun thawmthat ngai a enpui a, an mamawh a sawipui bawk.
I&PR director-in chhimlam tlawh
