Iran-a lungawi loh lantirnaah mi 29 thi awm tawh

Iran-a lungawi loh lantirnaah mi 29 thi awm tawh
Iran ram puma mipuiin lungawi lohna an lantira thi chu mi 29 vel an ni tawh tih mihring dikna chanvo humhalhtu pawlin an sawi.
Ram danga mi, Human Rights Activists News Agency (HRANA) chuan Thawhtanni zana thi mi pahnih bik chu venhim hna thawktu zinga mi an ni tih an sawi a. Iranian thuneitute erawh chuan thi zat hi an puang lo.
HRANA hian province 31-a 27-a eibar dinhmun hniam lutuk avanga mipui lungawi loh lantirnaah hian mi 64-in hliam an tuar a, mi 1,200 man an ni tawh tih an sawi bawk.
Thawhlehnia BBC Persian-in video a tihchhuahah chuan Tehrana Grand Bazaar-ah puithiam roreltute duh lohna au chhuahpuitu mipuite chu mittui tlakna hmanga an phuh lai a lang.
Lungawi lohna hi December 28 atanga tan kha a ni a, dawrkaiten Iranian pawisain US dollar laka hlutna nasa taka a hloh avanga an thinrimna an lantir atangin a intan a ni.
Iran hi nuclear programme avanga hrekna an tawrh avangin an sum dinhmun a hniam hle a, rial chuan nikum khan a hlut loh lai ber thlengin thil man pawh 40% chuangin a sang tawh.
University zirlaiten dawrkaite hi zawmin khawpui lian hrang hrang a kang kai zui a ni.
Zirtawpni khan President Donald Trump-a chuan Iranian venhim hna thawktuten muanawm taka lungawi loh lantirtute a that a nih chuan US inrawlhah a vau a, “Che chhuak turin kan inring reng,” a ti.
A tukah Iran-a thuneitu ber, Supreme Leader Ayatollah Ali Khamenei-a chuan ‘lungawi loh lantirtute hi an awm hmunah dah tur’ an nih thu leh ‘hmelma anga en loh tur’ tiin a sawi zui.
Thawhlehnia Tehran-a Grand Bazaar-a pun khawmnaah hian kawtthler khat vekin an kal khawm a, Khamenei-a tihchhanin ‘Death to the dictator’ tiin an au rual.
A hnu lawkah mittui tlakna hmanga phuh an nih avangin an tlan darh a, an bula riot police awmte hnena ‘zahpuiawm’ tia an au khum lai a lang a. A bul in chung atanga video lakah chuan mittui tlaknaa nasa zawka phuh an nih avanga an tlanchhe lai a lang bawk.
Tun tuma lungawi loh lantirna hi kum 2022-a police-in burqa a inbel loh avanga Kurdish nula an man, Mahsa Amini-i an kuta a awm laia a thih hnua lian ber a ni.
Kha mi tum khan mi 550 chuang thiin mi 20,000 chuang an venhim hna thawktuten an man niin mihring dikna chanvo humhalhtuten an sawi.