Indian external affairs ministry chuan sorkarin Asia khawthlanga a mi tangkhangte himna leh thatna tur a ngaihtuah mek zel tih a sawi a. Iran chhuahsan duhte chu Armenia leh Azerbaijan kaltlanga an hawna tur ngaihtuah an ni tih a sawi.
MEA thupuangtu, Randhir Jaiswal chuan Inter-Ministerial Briefing on Recent Developments in West Asia-a thu a sawinaah Tehran-a Indian Embassy chu a thawk chhunzawm zel a, a inralring reng tih a sawi a. Sorkar chuan India mi, zirlai leh biakzinte pawh huamin ram chhuahsan duhte a pui mek tih a sawi.
Ram kaltlanga Iran chhuahsan thlangtute chu embassy chuan Armenia leh Azerbaijan-a luh theihna turin a pui mek tih a sawi a, heta tang hian sumdawng thlawhna hmangin India-ah an kir leh thei dawn tih a sawi.
“Mi dang pawh an awm chhunzawm zel a. Kan embassy nen hian kan inbe reng a. Zirlai thenkhat leh tlawhtu dang, biakzinte pawh an himna tur atan khawpui hrang hrangah kan sawn chhuak a. Tehran-a kan embassy-in a pui a, leia ramri kânna siama Armenia leh Azerbaijan-a luh duhte chu luhtir an ni a, chuta tang an rama lo kir leh duhte chu an kal thei,” a ti.
Jaiswal-a chuan Indian-te chu thurawn zawm tur leh embassy leh consulate-te nena inpawh reng turin a ngen a. He biala Indian-te tana himna, dinhmun leh tanpuina pek mek a sawi bawk.
“Khawngaihin kan social media leh kan thuchhuahte hi Gulf biala Indian-te thatna chungchanga update hmuh theih nan lo follow ve rawh u. Iran hian ngaihven a hlawh a, zirlai tam tak kan nei a, mi dang, 9,000 vel an awm bawk a. An zinga tam tak chuan kan thurawn zawm chunga ram chhuahsanin an ramah an kir leh ta a ni,” a ti.
Heng laia Indian mission-te chuan thil awm dan an thlithlai reng a, thurawn thar an pe chhuak a, tanpuina an pe bawk.
Jaiswal-a chuan sorkarin Gulf-a a Indian maktaduai 10-te himna a ngaih pawimawh thu a sawi a, Prime Minister Narendra Modi leh External Affairs Minister S Jaishankar te chuan heng lai vela ram hruaitute an inbia tih a sawi.
“In hriat angin GCC (Gulf Cooperation Council) ramah hian mi tam tak awm kan nei a, maktaduai 10 vel an ni a. An thatna hi a pawimawh ber a ni,” a ti.
Jaiswal-a sawi ang hian Prime Minister Modi-a leh External Affairs Minister Jaishankar te chuan GCC ram hrang hranga Indian maktaduai 10-te himna ngai pawimawh turin UAE, Qatar, Saudi Arabia, Oman, Bahrain, Kuwait, Jordan, Israel leh Iran-a an thawhpuite an be reng a ni.
Iran chhuahsan duhte Amenia & Azerbaijan kaltlangin hawtir
