Iran-in kum 2024-ah mi 975 tihlum
Mihring dikna chanvo humhalhtu pawl pahnih chuan nikum chhung khan Iran chuan mi 975 vel a tihlum niin Ningani khan an sawi.
Norway-a Iran Human Rights (IHR) leh French pawl, Together Against the Death Penalty (ECPM) chuan kum 2008 atanga IHR-in a chhinchhiah tanah Iran-a tihhlum an tam ber tum niin a tar lang.
“Hetiang zat hian Islam rorelnain thihna thupek a pek chhuah tamzia a tilang a ni,” tiin report an siam dunah an tar lang a. Iran hian thi tura tihna hi ‘politics-a mi rah behna hmanraw pui berah’ a hmang niin an sawi bawk.
“Intihlumna hian Islamic sorkarin thuneihna an chan reng theih nana a mite laka indo a kalpui dan a ni,” tiin IHR Director Mahmood Amiry-Moghaddam chuan a sawi.
“Kum tawp lam thla thum chhung phei kha chuan Iran leh Israel boruak chhe karah invau nan ni tin mi panga zel tihhlum ang an ni,” a ti.
Nikuma report an siamah kum 2023 chhungin mi 834 tihhlum an ni a, a hma kum aiin 17%-in a tam zawk niin report-ah tar lan a ni.
Nikuma mi 975 tihhlum zinga pali chu vantlang hmuha khai hlum an ni a, hmeichhia 31 tel bawkin hei hi kum 17 liam ta chhunga an tam ber tum a ni.
Mihring dikna chanvo humhalhtu pawlte chuan Iran hi China dawta mi tihlum tam ber niin an sawi a. Thuneitute hian an ram mite vauna atan an hmang niin an sawi hial a, hei hi kum 2022-a mipuiin sorkar duh lohna nasa taka an lantir hnuah a nasa zual niin an sawi bawk.
Thi tura inhremna hi kum 1979-a khawthlang ramten an thlawp Shah rorelna paih thlaa Sharia dana innghat rorelna hman a nih hnuah sawi hlawh ber a la ni zel.
Thi tura tihte hi tualthat, mi pawngsual leh ruihhlova buaina neite an ni tlangpui a; mahse, tun hnaiah ei ru leh sorkar laka hel ang chi pawh hrem an ni fo thin.
Tun hnai kum eng emaw zat chhung chu tihhlum hi lung in tuala khai hlum an ni thin a, a chang chuan vantlang hmuhah pawh tihhlum an ni fo bawk.
Mihring dikna chanvo humhalhtu pawlte chuan nikum khan Iran hian thi tura tihna thupek a chhuah tam hle a, tam tak erawh an finfiah thei lo niin an sawi.
Tuna an chhinchhiah chin bakah hian mi 39 dang tihhlum niin an sawi a; mahse, finfiahna an nei mai thei rih lo tih an sawi a ni.
IHR-in an chhinchhiah dan chuan kuminah pawh hian Iran hian mi 121 vel an tihlum leh tawh.
Iran-in kum 2024-ah mi 975 tihlum
