Pentagon-in July 25-a a tihchhuah thar berah President Donald Trump-a thupeka February thla tawp atanga Iran an beih hnuah US sipai 624-in hliam an tuar tawh tih tar lan a ni.
Heng zinga 417 hi Operation Epic Fury kaihhnawiha mite niin 207 chu ‘Overseas Operations’-ah a ni tih tar lan a ni.
US leh Iran hian April thla khan inkahhai puangin June thlaah Memorandum of Understanding an ziak zui a; mahse, hemi hnuah hian nasa takin an inbei tawn leh tawh.
Kar hmasa khan Pentagon hian indona an mi thi leh hliam zat a tichhuak thar a, Operation Epic Fury-a sipai pali thite chu Overseas Operations-a thiah an ziak lut thar.
Pentagon-a Defense Analysis Casualty System chuan a tirah Operation Epic Fury-a thi chu July 21 thleng khan mi 18 angin an chhinchhiah a, hliam tuar pawh 482 an ni.
Thi hming lite chu Ningani khan sawn lehin 14 thi angin chhinchhiah leh a ni ta zawk.
Thi palite hming hi Overseas Operations-ah ziah luh ta zawk niin heng mite hi ‘July 7, 2026 china thi leh hliamte’ zingah an tel tih an sawi a ni.
Hetianga sawi fiahna mumal awm lova thi leh hliamte hming ziahna sawn a nih avang hian sawisel pawh a awm a, thil langtlang tawk lo nia ngai an awm.
Pentagon thupuangtu, Sean Parnell-a chuan thi leh hliamte hming ziahna sawn hi ‘a tira chhinchhiahna buai awm vang’ tih X-ah a tar lang a. A hnuah Military Services puihna nen siam that a ni tih a sawi.
Trump-a pawhin Thawhlehni khan Truth Social-ah ‘Iran Military Conflict’-a an sipai thi chu 18 niin a lo tar lang tawh.
Associated Press chuan Pathianni khan a vawi khat nan Pentagon-in an website-ah ‘Overseas Operations’ hi an tar lang niin a sawi a. Hetah hian tun hnaia sipai thi palite hming langin hliam 207 an awm a, heng mite hi Iran indonaa hliam an ni ngei em tih finfiah erawh a ni lo.
US sipai pathum chu July 17 khan Iranian missile-in Jordan-a an hmun an kahnaah an thi a, Iraq-ah Iranian drone avangin pakhat a thi bawk.
July thla laihawl atang khan US chuan Iranian sipai hmunte bei thar leh tawhin Iranian sipaite pawhin an thenawm rama American awmhmunte a kap ve bawk a, zan 13 chhung a zawnin an inkap leh hman a ni.
Zirtawpni zan atang khan an inkah chhunzawm leh tawh rih lo thung.
Iran indonaah US sipai inhliam 624 awm tawh
