Iran indona chuan mi maktaduai 30 chuang retheihnaah a hruai kir leh dawn a, buaina chhuak hian thla tharah chuan ei leh ina harsatna a tipung thei dawn niin United Nations-in a sawi.
Bungraw phur lawngte tan Strait of Hormuz kaltlang thei lova khar chhunzawm zel avanga tuialhthei leh lei tihthatna phurh a buai avangin thlai thar a tlahniam tan tawh a, kumin kumtawp lamah thlai thar a tichhe dawn niin UN hnuaia development chief chuan Ningani khan a sawi.
“Naktuk hian indona hi tihtawp ni ta se, nghawng na tak a nei tawh dawn sa a, mi maktaduai 30 chuang chu retheihnaah a hruai kir leh dawn a ni,” tiin United Nations Development Programme (UNDP) Administrator Alexander De Croo-a’n a sawi.
US-Israel tang dunin Iran an beihnain a nghawng dangte awm theite pawh sawiin heng zingah hian energy tlakchhamna pawh a tel tih a sawi.
Khawvela lei tihthatna tam zawk hi Middle East-a siam a ni a, khawvel pum huapa pek chhuah hmun thuma thena hmun khat chu Strait of Hormuz kaltlanga phurh a ni a, Iran leh US chuan tuikawng pawimawh hi thunun zawk nih tumin an bei nasa dun hle.
UN Food & Agriculture Organization (FAO) chuan kar hmasa khan he strait-a harsatna rei tak a awm chuan khawvel pumah ei leh in lama ‘chhiatna nasa tak’ a thleng thei tih a lo sawi tawh bawk.
FAO-in a tar lan dan chuan India, Bangladesh, Sri Lanka, Somalia, Sudan, Tanzania, Kenya leh Egypt te chu a tuar thei langsar ber an ni.
“Ei tur tlakchhamna hi thla rei lo te hnuah a nasat ber lai ber a thleng thei dawn a – hei bak hi hmabak a awm thei lo a ni,” tiin De Croo-a chuan a sawi.
Iran buaina avang hian khawvel pum sum thawh chhuah, gross domestic product (GDP) pawh 0.5% atanga 0.8% velin a tihniam tawh niin De Croo-a chuan a sawi bawk a, “Thil siam that nan kum sawm tam tak a ngai a, tihchhiat nan chuan chawlhkar riat chhung indona chauh a ngai a ni,” a ti.
Belgium prime minister hlui, De Croo-a hian Middle East buaina hian khawvel hmun dangah mihring puihna kawnga hmalakna a tibuai hle tih a sawi bawk a, hemi lamah hian ramin sum a thawh thin chu a tlem sa tawh em em niin a sawi bawk.
February 28 atanga US-Israel tang dunin Iran beih tan khan mihring puihna kawnga pawimawh tak takte pawh a titawp a, khawvela a mamawh ber ber rama nunna chhan nana pawimawh thil thawn chhuah a khawtlai phah a ni.
“A tuartute hnenah ngaihdam kan dil tak zet a; mahse, kan pui thei lo che u a ni,” tiin De Croo-a chuan a sawi a. “Tanpuina hmanga dam khawchhuak turte chuan hei hi an nei dawn lo va, hlauhawm zawkah an nawr lut dawn a ni,” a ti.
Iran indonain mi mtd 30 chuang retheihnaah kirpui dawn – UN
