Rilru hah lai te, carbonated drinks (Coca Cola, pepsi, etc) leh zu lam chi in te hian irhfiak a awm duh zual niin an sawi a, nuih nasat lutuk pawhin min ti irhfiak thei niin an sawi bawk.
Puitlingah chuan irhfiak leh rilru hi a inzawm leh niin an sawi a, chutihlaiin nausen-ah irhfiak hi eng vanga awm nge tih pawm tlan thlap thei ‘chu chu a ni e’ han tih fak tur mithiam te pawhin an la hre bik lo a nih hmel a. Zirchianna an neih thenkhatah chuan nuin a thil ei leh in avangin a hnute tui hnetu nausen chu a ti irhfiak thei niin an sawi.
Hetiang a nih vang hian nau hnute pe lai nu te chuan thil spicy lutuk ei tam loh a tha a, chutiangin caffeine tamna chi pawh in tam loh a tha niin an sawi. Nausen chu chaw sakhat (solid food) kan ei tir tan tirh lamah pawh irhfiak a nei duh niin an sawi bawk.
Hei bakah hian boruak lum leh vawt inthlak thutin irhfiak hi a awm tir thei niin an sawi a, a bikin nausenah he mi nghawng hi a lang nasa lehzual niin an sawi.
Irhfiak hi a tihreh dan kawng tam tak a awm niin an sawi a, Times Of India health section-in a sawi thenkhat kan rawn tarlang e:
1. Irhfiak tihreh dan tha ber pakhat chu awm hahdam a, thaw lak dan control tur a ni. I theih tawpa rei thaw loa awm han tum chhin teh. Hei hian irhfiak a ti reh duh viau a nia.
2. Thaw la miah loin tui no thum vel han in tlak pap pap teh. Hei pawh hi irhfiak tih reh nana hman lar pawl tak a ni.
3. Chini emaw khawizu emaw ei pawh hi irhfiak tih reh nana hman lar tak a ni.
4. Rilru lak pen hi a thawk tha duh khawp mai. Mizote pawhin irhfiak chu inbumin a reh duh, kan lo tih hi a dik viau a nia.
5. Lemon method an ti a, ser chu a lai takah tan bung la, a leh lam leh lam atangin a tui fawp chhuak rawh.
6. Irhfiak chu a reh lawk thei lo a nih chuan damdawi lam thiam rawn tur a ni.
Irhfiak ngaihthah mai suh
