Simon Harris chu Irish political party Fine Gael leader thar atana pawm fel niin tihian kum 37 leka upa hi Ireland taoiseach (prime minister) naupang ber a ni thei dawn ta a ni.
Irish government minister Harris hi party leadership chuha candidate awm chhun a ni a. Kar kalta Nilaini a party leader leh taoiseach atanga bang Leo Varadkar a thlak dawn ta a ni.
Harris chuan Fine Gael leader a ni chu a nuna chawimawina sang tia sawiin amaha rinna nghattu party hruaitu te hnenah lawmthu sawiin an rin zawhna chu thawhrimna hmanga a chhanlet tur thu a sawi zui bawk.
Harris chuan ‘tun hi Fine Gael in reset hun a ni a, tun hi Fine Gael reconnect hun a ni’ tiin a sawi a. Mahse, Harris hian 9 April a Dail (Irish parliament) thutkhawm hma chuan cabinet chung changah thutlukna a siam rin a ni rih lo thung.
Harris hi Irish further and higher education minister ni sa a ni a, minister dang amah khing thei tura ngaihte chuan an inhnuhdawhsan leh a ni.
Simon Harris an Sinn Fein chungchang a sawi
Pathianni khan a leadership tihchian a nih hnuah party convention a thusawina a neihah Harris chuan “chona a kiang ngai lo, a inthlak danglam mai chauh thin” tiin a sawi a.
“Harsatnate chu fundamental values – beiseina, paukhauhna, opportunity inang tlang, integrity, security te he ram rawngbawl nana kipui te kan kalpui reng chuan kan hmachhawn thei zel ang” a ti a, heng values te hi atan chuan ‘engkim’ a nih ngawt thu a sawi bawk a.
“Mipui rawngbawl leh politics thiltih theihna hian mipui te nun ah a tha zawngin danglamna a siam a ni tih hi ka rin dan a ni” tiin a sawi bawk.
Irish general election chu March 2025 ah neih tur niin Harris chuan Fine Gael te elpui ber tur Sinn Fein te chu a bei nghal bawk a.
“Sinn Fein te hian kan economy tlusawp tawh kan kaiharh leh avangin Fine Gael te thiltih anlet leh pawh an ngam lo. An tum ber chu thil nihna haidera kan service te sawisel a ni mai” tiin a sawi bawk.
Kum 37 chauha upa Harris hian history siam dawnin Ireland taoiseach naupang ber a ni dawn ta a ni. Kum 24 mi lek niin kum sawm kalta khan Dáil (lower house of Irish parliament) atan thlantlin a ni a.
Party-ah a thleng sang chak hle a, cabinet ni nghalin kum 2016 htleng han health minister a ni zui a. Minister ni zui zelin minister for further and higher education, research, innovation and science bakah justice portfolio te pawh a chelh a ni.