Iron rod size a nih tura anga sawi, ni pha lo zawrhchhuah a awm thin nia sawi chu sawrkarin hma a la dawn a, hetiang zuartu emaw a company lam emaw pawh nise an chunga hremna lek a nih ngei theihnan hma lak tum a ni.
Mizorama iron rod size tling lo zawrh thin tihtawp dan ngaihtuahin Thawhlehni khan Consumer Affairs minister B Lalchhanzova hoin a kaihhnawih sawrkar aiawh leh pawl aiawh an thukhawm a. Mizoram Civil Engineers’ Association leh PWD lamin rod size tlinglo hman a hlauhawm dan an sawifiah a ni.
Mipui himna atan chak zawka hma lak an rel a. Iron rod zuartu company-te hnenah rod size dik chauh Mizorama lalut tura hriattirna leh vaukhanna ziaka pek nise, an ti. BIS (Bureau of Indian Standards) nena thawh dunna tih chak a, Mizorama rod size diklo zuarte leh chutiang ti tura hma latute zawng chhuak tura chak taka bawhzui nise an ti.
Hriattirna chhuah a nih hnu pawha ti lui chu, rod zuar an ni emaw rod company an ni emaw an chungah hremna lek ngei nise, tiin a rel a. Mipui pawhin rod man tlawm ringawt um loin, rod size dik lei nachang hria se ,tii,n hmalakna tur ruahmanna an siam a ni.
FCS&CA minister chuan, Mizoram hmun tam takah danin a bituk aia tea iron rod hralh a awm nia thu dawn bawhzuiin hetiang hun hi buatsaih an ni tih a sawi a. Lirnghing na tak thlen fo theihna laia awm kan nih avangin, in sakna atana rod kan hman chu a len zawng, rih zawng leh a chak lamah mithiamten a nih tur ang an duan a tling pha ngei ngei tur a ni tih a sawi. Rod size tlinglo hman hian in chakna chu nasa takin a tihniam thin a, hei hi a him lo takzet tih a sawi bawk.
Thutkhawmah hian FCS&CA, Legal Metrology, PWD Quality Control Division, Mizoram Consumers’ Union bakah All Mizoram Cements & Iron Rod Dealers’ Association an tel a ni.
Iron rod size tling lo zuarte chungah hremna lek an tum
