Indian Super League 2025-26 season chu an tan dawn ta nge nge a nih hmel a, match hmasabera inhmachhawn tura an dah chhin pawh a hriat theih ta a, February ni 14 khian opening fixture-ah defending champion Mohun Bagan Super Giant chuan Kolkata khawpuia Salt Lake Stadium-ah Kerala Blasters an mikhual ang.
Single-leg home-and-away format hmanga khelh tur ISL 2025-26 fixture duan chhinna hmasa (tentative schedule) an tarchhuak a, tah hian marquee Kolkata derby match-a Bagan-in an hmelma lian East Bengal an hmachhawna hun atan May ni 3 dah niin, league-stage match hnuhnungber chu May ni 17-ah Chennaiyin FC leh Bengaluru FC-te’n an khel dawn a ni.
National federation (AIFF) hian ISL huaihawttu tur sumdawng thawhpui la nei lo mah se tun dinhmunah AIFF thawhpui duh sumdawng pali an awm thu hriat niin, he’ng mie nen hian January ni 13 khan an ngamna zat nena ziaka an duhna thlen hmaa lo inhmuhkhawm lawkna masa (pre-bid meeting) buatsaih a ni.
January ni 18 khan AIFF chuan ISL 2025-26 season pechhuak duhte tan broadcast rights dilna Request for Proposal (RFP) document thehluh hun a hawng a, bidder-te tana ziaka ISL organiser nih duhna lehkha thehluh hun hnuhnungber atan February ni 1 ruat nghalin, a tuk, February ni 2-ah an lehkha hmuh (bid)-te chu hawn a ni ang.
ISL huaihawt tura sumdawng thawhpui an awm mai loh avanga a hun taka Indian top flight season thar tan theih tak loh chu thla thar hian khelh tan a ni dawn a; he mi tur hian AIFF lamin sum an thawh phawt a, ISL club-te’n an thawh ve bawk.
Season tharah hian nikum lama inlan club 14 an chhuak kim leh vek dawn a, home and away basis-in match 91 khelh a ni ang.
Kartawp tam berah chuan match khat zel khelh a ni dawn a; chutih laiin Thawhtanni leh Ningania khelh turin match sarih ve ve dah a ni a; Thawhlehnia khelh turin match li an ruat a; Nilainiah match hnih an khel thung dawn a ni.
Champ lai Mohun Bagan chuan tun season-a match 13 an khelh turah game sarih chu home-ah an khel dawn a, Salt Lake Stadium-ah mikhual an thleng leh ang.
Varanasi lama inkulh debutant Inter Kashi chu I-League trophy an lak avanga ISL khel tura kai chho niin, Bhubaneswar khawpuia Kalinga Stadium chu an home venue a ni dawn a, he khelmualah match 13 an khelh tura match ruk khelh a ni ang.
Kalinga Stadium Odisha FC hi pawhin an home turf atan an hmang a, anni pawh hian match ruk bawk he stadium-ah hian home match an khel dawn a ni.
Mohammedan Sporting chuan Jamshedpur khawpuiah match li an khel dawn a; Jamshedpur FC pawhin hei tho hi home ground atan an hmang a, match 13-ah match li bawk an khel ang, he mualah hian.
Sporting Club Delhi chuan an home venue atana an hman Jawaharlal Nehru Stadium-ah game ruk an khel dawn a; he venue vek hi Punjab FC pawhin an home ground atan an hmang a, tah hian match sarih an khel ang.
Tentative fixture tarchhuaha a lan danin, Chennaiyin FC pawhin JLN Stadium-ah hian home match ruk an khel dawn a ni.
ISL bul \annaa intum tur: Mohun Bagan vs Kerala Blasters
