Islamabad-a thihchilh bomb puakah mi 12 thi
Pakistan khawpui, Islamabad-a court tuala thihchilh bomb tihpuahah mi 12 an thi a, mi dang 27 velin hliam an tuar bawk tih an ram interior minister-in a sawi.
Mohsin Naqvi-a chuan bomb paitu hian district courthouse chhunga tihpuah a tum zawk a, a chhungah a lut thei ta lo niin a sawi.
Naqvi-a hian a tipuaktute chu tute nge tih hriat an tum hmasa ber tih sawiin an chungah dan anga dikna hlen chhuah ngei a ni dawn tih a sawi.
Pakistani Prime Minister Shehbaz Sharif-a chuan ‘India-in a puih’ kal firfiak pawl inrawlhna a awm ngei niin a sawi.
Indian sorkar thupuangtu erawh chuan a dik loh thu leh prime minister sawi hi ‘tanchhan awm lo leh inpuh chhan tur awm lo’ a nih thu a sawi.
Sharif-a’n thuchhuah a siamah hian ‘India-a firfiak pawl thlunzawmtu firfiakten pawisawi lo Pakistan khua leh tui a bei hi a demawm hle a ni’ tih a tar lang.
Pakistani Taliban (TTP) peng pakhat, Jumaat Ul Ahrar chuan an tihah an chhal tih tual chhung chanchinbuten an tar lang tawh hlawm a. Hetih lai hian tual chung chanchinbu mi pahnih chuan TTP hruaitu lawkten message an thawnah he thilah hian inhnamhnawihna an nei lo tih an sawi niin BBC an hrilh thung.
Islamabad-a thilhchilh bomb tihpuah hi tun hnaiah a thleng khât hle tawh a. Thawhlehnia a puahna hmunah hian car kang chhe tawh tak tak a awm a, police-in a hmun hi an khar nghal.
Hliam tuar mi 27 hi damdawia enkawl mek an ni tih Naqvi-a chuan a sawi a. A tipuaktu hian minute 15 vel a nghah hnuah police car bulah a tipuak tih a sawi.
Video thehdarhah chuan meikhu a zam nasa hle a, venhim hna thawktuten an hungna karah lirthei kang chhia hmuh tur a awm nual a. A puah hun hi chhun dar 12:39 (India-a chhun dar 01:09)-ah a ni.
Pakistani President Asif Ali Zardari-a pawhin ‘thihchilh bomb puak hi a demawm tak zet’ tih a sawi.
Thawhtanniah khan Pakistan thenawm, India-a an khawpui, Delhi-ah bomb a lo puak tawh a, mi pariat thiin eng emaw zatin hliam an lo tuar tawh bawk.
Indian sorkar chuan he thil thleng hi firfiak tih angin sawi lo mah se firfiaka chetna chhuitu pawl an chhuitir nghal.
Indian Prime Minister Narendra Modi-a chuan a titute chu tumah zuah an ni dawn lo tih a sawi a, engvanga tihpuah nge tih chiang taka hriat a la ni lo.
Pakistani khawpuia thihchilh bomb tihpuah hnuhnung ber chu kum thum liam ta kha niin police officer a thi a, mi dang eng emaw zatin hliam an tuar bawk.
Islamabad-ah chauh ni lo, an ram hmun dangah pawh tun hnaiah hetiang beihna hi a thleng tam lo hle bawk.
Islamabad-a thihchilh bomb puakah mi 12 thi
