Israel-in a mite him taka awmtir turin Russia a ngen

Tel Aviv atanga Makhachkala airport a thlawhna a tum rualin mipui thinrim te chuan an pankhawm mai a. Aircraft hi an hual zui nghal a ni.
Russia aviation agency Rosaviatsia chuan security forces ten an thunun nghal vat tiin a sawi a. He airport hi khar nghal niin Thawhleh hian hawn leh chauh tur a ni bawk a.
Israel atanga North Caucasus pan thlawhna tin te chu hmun danga tum tir phawt tur a ni bawk a. Mi paruk man zui an nih thu Russian news agency te chuan an sawi a ni.
Heng airport-a thlawhna kal hualtute hian Palestinian flags an vai nia sawi a ni a. Chu mai bakah antisemitic slogan aupuiin a then chuan “Allahu Akbar” – God is greatest tih chu an aupui bawk.
Passenger pakhat chuan mipui thinrimin an tih din thu sawiin mahse a hnu lawkah an chhuah zalen thu leh “Non-Jews te chu kan khawih dawn lo” an tih thu a sawi zui bawk.
Local telegram channel chuan mipuite chu thlawhna tum hma in airport pan tura ngenin thlawhna chuan te chu Jewish an nih leh nih loh enfiah vek turin thuchhuah an thehdarh a ni.
Dagestan hi North Caucasus a Muslim Russian republic niin Caspian Sea khawthlang tawp lama awm niin mi maktaduai 3.1 vel chenna a ni a. Sorkar chuan thil thleng chu an chhui chian thu erawh an sawi zui nghal thung.
Dagestan city of Derbent rabbhi Ovadia Isakov chuan local media te hnenah Dagestan jewish family 300-400 vel te dinhmun chu a chiang tawh lo tiin a sawi a. Jews te chu heng lai velah hian helai region Islamic tena an thunun hma dah atang tawha cheng tawh an ni tiin a sawi bawk.
Israeli prime minister’s office chuan Russia chuan Jews leh Israelis te laka tharumthawhna awm thei chu a tudai tur a ni a ti a. US presidential spokesperson Andrianne Watson pawhin, “United States chuan Dagestan a antisemitic protest kalpui chu a dem takzet,” tiin a sawi bawk a.
Dagestan sorkar chuan Gaza an thlawp thu sawiin chutihrual erawh chuan khua leh tui te chu thil duhawm lo thleng thei laka inthiarfihlim turin a ti thung a. Israel-in Gaza a beihnaa khawvel hmun hrang hrangah lungawilohna lantirin a awm mek thung.
Dagestan’s Governor Sergei Melikov chuan aiport luhchhuah tuma beihna chu a dem thu sawiin, “mikhual te laka hleilenna kalpui leh passenger te ipte zensak chu a zahawm lo” tia sawiin, “hmeichhia leh naupang te thlenga dimlohna chu a demawm takzet” tiin a sawi bawk.
Mipui thinrim thenkhatte chetlak dan chu Russian armed forces tana Ukraine a indona kalpui mektu Dagestani patriots te hnung lama beihna a ni tiin a sawi bawk a.
“Airport-a thil thleng chu thil duhawm lo tawp niin law enforcement ten an enfiah ngei tur a ni bawk,” tiin a sawi.
Israeli foreifgn ministry chuan Moscow-a Israeli ambassador chuan Russian thuneitute a biak thu sawiin Israel chuan a khua leh tui leh Jews te khawi hmunah pawh beih an nih chuan a ngaihthah dawn lo a ti bawk.
Kar kalta Inrinni pawh khan Dagestan a Khasavyurt khawpuia hotel pakhatah a chungah Israelis thenkahtte an thleng nia sawiin pawnah an pungkhawm a. Hotel tukverh te lunga vawmin ‘Israel khua leh tui te tan luh khap tlat a ni’ tiin hotel pawnah an ziak bawk.